About Author

अख्तियारका सहसचिव योगेन्द्र पाण्डेले दिए पदबाट राजीनामा

काठमाडौँ– अख्तियार दुरुपयोग अनुसन्धान आयोगका सहसचिव योगेन्द्र पाण्डेले निजामती सेवाबाट राजीनामा दिएका छन्। पाण्डेको राजीनामा भोलिदेखि लागू हुने बताइएको छ। नियमित अवकाशका लागि उनको करिब डेढ वर्ष सेवा अवधि बाँकी रहेको बताइएको छ । संघीय निजामती सेवा विधेयकमा प्रस्तावित ‘३० वर्ष सेवा अवधि वा ५५ वर्ष उमेर’सँग सम्बन्धित व्यवस्थालाई लिएर कर्मचारी वृत्तमा बहस र चासो बढिरहेका बेला पाण्डेको राजीनामा आएको हो। पछिल्लो समय सेवा अवधि बाँकी छँदै सचिव, सहसचिवलगायत उच्च तहका कर्मचारीले राजीनामा दिने क्रम बढेको छ। प्रशासन डटकमलाई प्राप्त पछिल्लो विवरणअनुसार विभिन्न तहका ५३८ निजामती कर्मचारीले राजीनामा दिएका छन्। तीमध्ये ३ सचिव र २५ बढी सहसचिव छन्। संघीय निजामती सेवा विधेयकमा प्रस्तावित ‘३०–५५’ को व्यवस्थाले विशेष गरी लामो सेवा अवधि पूरा गरिसकेका कर्मचारीबीच आफ्नो भावी सेवा अवधि, अवकाश र निवृत्तिभरणलाई लिएर चासो बढाएको छ। यही बहस चलिरहेका बेला नियमित अवकाशका लागि करिब डेढ वर्ष बाँकी रहेका पाण्डेको राजीनामाले उच्च तहका अनुभवी कर्मचारीले समयअगावै निजामती सेवा छाड्ने क्रमलाई पुनः चर्चामा ल्याएको छ।