चैतन्य सम्बाददाता, Author at Chaitanya News - Page 95 of 1150
  • 2026-11-20
  • 07:23:57
  • शुक्रबार,मंसिर ०५, २०८३

About Author

भोटेकोशी बाढी अपडेट: पाँच हजार सम्पर्कविहीन, एक हजार ३३१ शव फेला

काठमाडौँ– रसुवास्थित भोटेकोशी नदीमा आएको विनासकारी बाढीपछि बेपत्ता भएकाहरूको खोजी कार्य जारी रहे पनि अझै करिब पाँच हजार जना सम्पर्कविहीन रहेका छन्। बाढीपछि हालसम्म एक हजार ३३१ जनाको शव फेला परेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। प्राधिकरणका अनुसार फेला परेका शवमध्ये रसुवामा १५६, नुवाकोटमा १९५, धादिङमा ६७, गोरखामा ७४, तनहुँमा ३८, नवलपरासीपूर्वमा २२२, नवलपरासीपश्चिममा २१९ तथा चितवनमा ३६० रहेका छन्। प्राधिकरणका प्रवक्ता शान्ति महतका अनुसार सम्पर्कविहीन हुनेमा रसुवाबाट करिब एक हजार ९६७ र नुवाकोटबाट करिब दुई हजार ३४० जना छन्। यस्तै, ५८९ जना विदेशी नागरिक तथा सुरक्षाकर्मी र कर्मचारी गरी थप १०० जना सम्पर्कविहीन रहेको विवरण प्राप्त भएको छ। बेपत्ताको सङ्ख्या ठूलो रहेकाले सुरक्षा निकायले खोजी तथा उद्धार अभियानलाई थप तीव्र बनाएका छन्। बाढी प्रभावित विभिन्न क्षेत्रबाट हालसम्म १३ हजार १०१ जनाको उद्धार गरिएको छ। नेपाली सेनाले चार हजार १६२, नेपाल प्रहरीले चार हजार ६८ तथा सशस्त्र प्रहरी बलले संयुक्त रूपमा चार हजार ८७१ जनाको उद्धार गरेको प्राधिकरणले जनाएको छ। बाढीबाट प्रभावित तथा घाइते पाँच हजार ९२९ जनाले उपचार सेवा लिएका छन्। विभिन्न अस्पतालमा ३१६ जना, नेपाली सेनाबाट तीन हजार २९७ जना र सशस्त्र प्रहरी बलबाट दुई हजार ३१६ जनाले स्वास्थ्योपचार सेवा लिएका छन्। यस्तै, फेला परेका शवमध्ये हालसम्म ९८ जनाको सनाखत गरी आफन्तलाई बुझाइएको छ। बाढीका कारण विस्थापित भएकाहरूलाई सुरक्षित आश्रय दिन काठमाडौँ, रसुवा, नुवाकोट र धादिङमा ४१ वटा होल्डिङ सेन्टर सञ्चालनमा छन्। ती केन्द्रमा तीन हजार ९८२ जनाले आश्रय लिइरहेका छन्। भोटेकोशी बाढीपछि मानवीय क्षतिको दायरा ठूलो देखिएसँगै राज्यका सुरक्षा निकाय, स्थानीय तह तथा विभिन्न सरकारी र गैरसरकारी निकायले खोजी, उद्धार, उपचार तथा राहत व्यवस्थापनलाई निरन्तरता दिएका छन्। अझै ठूलो सङ्ख्यामा मानिस सम्पर्कविहीन रहेकाले उनीहरूको अवस्था पत्ता लगाउन खोजी अभियानलाई थप प्रभावकारी बनाइएको प्राधिकरणले जनाएको छ।

News by भोटेकोशी बाढी अपडेट: पाँच हजार सम्पर्कविहीन, एक हजार ३३१ शव फेला :