चैतन्य सम्बाददाता, Author at Chaitanya News - Page 210 of 1153
  • 2026-11-22
  • 13:39:57
  • आइतबार,मंसिर ०७, २०८३

About Author

समूह चरणमा मेसीको दबदबा, ६ गोलसहित गोल्डेन बुट दौडमा एकल अग्रता

काठमाडौं– फिफा विश्वकप २०२६ को समूह चरण सकिँदा अर्जेन्टिनाका कप्तान लियोनल मेसी ६ गोलसहित सर्वाधिक गोलकर्ताको सूचीमा एकल अग्रतामा पुगेका छन्। समूह चरणमा मेसीसहित क्यानडाका जोनाथान डेभिड र फ्रान्सका उसमान डेम्बेलेले ह्याट्रिक गरेका छन्। अमेरिका, मेक्सिको र क्यानडामा संयुक्त रूपमा भइरहेको विश्वकपमा सोमबार बिहान समूह चरणका सबै खेल सम्पन्न भएका हुन्। मेसीले समूह ‘जे’ को पहिलो खेलमा अल्जेरियाविरुद्ध ह्याट्रिक गर्दै विश्वकपमा सर्वाधिक १६ गोल गर्ने मिरोस्लाभ क्लोजको कीर्तिमान बराबरी गरेका थिए। त्यसपछि अस्ट्रियाविरुद्ध दुई गोल गर्दै उनले विश्वकप इतिहासकै सर्वाधिक गोलकर्ताको कीर्तिमान आफ्नो नाममा लेखाए। जोर्डनविरुद्धको अन्तिम समूह खेलमा दोस्रो हाफमा बेन्चबाट मैदान प्रवेश गरेका उनले थप एक गोल गर्दै यस विश्वकपमा आफ्नो गोल संख्या ६ पुर्‍याए। जोर्डनविरुद्धको गोलसँगै मेसीले विश्वकपमा व्यक्तिगत गोल संख्या १९ पुर्‍याएका छन्। साथै उनी विश्वकपमा लगातार सात खेलमा गोल गर्ने पहिलो खेलाडी पनि बने। उनले सन् २०२२ को विश्वकपका अन्तिम चार खेल र यस संस्करणका समूह चरणका तीनवटै खेलमा लगातार गोल गरेका हुन्। मेसी दुई पटक गोल्डेन बल अवार्ड जितिसकेका छन्। तर विश्वकपको गोल्डेन बुट भने अहिलेसम्म जित्न सकेका छैनन्। यसपटक भने उनी त्यसका प्रमुख दाबेदार बनेका छन्। समूह चरणमा क्यानडाका जोनाथान डेभिडले कतारविरुद्ध तथा फ्रान्सका उसमान डेम्बेलेले नर्वेविरुद्ध ह्याट्रिक गरेका थिए। सर्वाधिक गोलकर्ताको सूचीमा मेसीलाई पछ्याउने खेलाडीमा फ्रान्सका कप्तान किलियन एमबाप्पे, उसमान डेम्बेले, ब्राजिलका भिनिसियस जुनियर र नर्वेका एर्लिङ हालान्ड छन्। चारै खेलाडीले समान ४–४ गोल गरेका छन्। हालान्डले पहिलो दुई खेलमा दुई–दुई गोल गरे पनि समूह चरणको अन्तिम खेल खेलेनन्। एमबाप्पेले पनि पहिलो दुई खेलमा गोल गरेपछि नर्वेविरुद्ध गोल गर्न सकेनन्। यद्यपि उनले दुई असिस्ट गरेका कारण गोल्डेन बुटको प्रतिस्पर्धामा बलियो स्थितिमा छन्। उनले सन् २०२२ को कतार विश्वकपमा फाइनलमा ह्याट्रिकसहित कुल ८ गोल गर्दै गोल्डेन बुट जितेका थिए। ब्राजिलका भिनिसियस जुनियरले समूह चरणका तीनवटै खेलमा गोल गर्दै लगातार तीन खेलमा गोल गर्ने पाँचौँ ब्राजिलियन खेलाडी बन्ने कीर्तिमान बनाए। उनी तीनै खेलमा प्लेयर अफ द म्याचसमेत घोषित भए। यस्तै जर्मनीका डेनिस उन्डाभले ३ गोल गरेका छन्। सुपर सबका रूपमा मैदान प्रवेश गरेका उनले दुई खेलमा गोल गर्नुका साथै दुई असिस्ट पनि गरेका छन्। असिस्टतर्फ स्वीडेनका अलेक्जान्डर इसाक ३ असिस्टसहित शीर्ष स्थानमा छन्।

News by समूह चरणमा मेसीको दबदबा, ६ गोलसहित गोल्डेन बुट दौडमा एकल अग्रता :