चैतन्य सम्बाददाता, Author at Chaitanya News - Page 19 of 1152
  • 2026-11-21
  • 12:59:59
  • शनिबार,मंसिर ०६, २०८३

About Author

सिँचाइ आयोजनामा पहिलो त्रैमासमै उत्साहजनक प्रगति, महाकाली सबैभन्दा अगाडि

काठमाडौँ– चालु आर्थिक वर्ष २०८३/८४ को पहिलो त्रैमासमा ठूला सिँचाइ आयोजनाहरूले निर्माण तथा खर्च प्रगतिमा उत्साहजनक उपलब्धि हासिल गरेका छन्। बजेट कार्यान्वयनको सुरुआती तीन महिनामै केही आयोजनाले भौतिक लक्ष्यको ९० प्रतिशतभन्दा बढी प्रगति गरेका छन् भने निर्माण कार्यमा पुँजीगत खर्चको हिस्सा पनि उल्लेख्य देखिएको छ। ऊर्जा, जलस्रोत तथा सिँचाइ मन्त्रालयअन्तर्गत जलस्रोत तथा सिँचाइ विभागले पहिलो त्रैमासमा कुल २३९.३ करोड रुपैयाँ खर्च गरेको छ। विभागको कुल खर्चमध्ये ८८ प्रतिशत रकम पुँजीगत अर्थात् निर्माण कार्यमा खर्च भएको महानिर्देशक दिनेश रजौरियाले जानकारी दिए। पहिलो त्रैमासमा सबैभन्दा उत्साहजनक प्रगति महाकाली सिँचाइ आयोजनाले गरेको छ। कञ्चनपुरमा सञ्चालित उक्त आयोजनाले त्रैमासिक भौतिक लक्ष्यको ९७.२ प्रतिशत हासिल गरेको छ। आयोजनाले यस अवधिमा ४३.७ करोड रुपैयाँ खर्च गरेको छ, जुन त्रैमासका लागि विनियोजित बजेटको अढाई गुणाभन्दा बढी हो। त्यस्तै, बबई सिँचाइ आयोजनाले त्रैमासिक लक्ष्यको तुलनामा ८१.८ प्रतिशत र सिक्टा सिँचाइ आयोजनाले ८०.२ प्रतिशत भौतिक प्रगति गरेका छन्। रानी जमरा कुलरिया सिँचाइ आयोजनाले पनि ७१ प्रतिशत प्रगति हासिल गरेको विभागले जनाएको छ। यी चार ठूला आयोजनामा मात्रै पहिलो त्रैमासमा १३९ करोड रुपैयाँ खर्च भएको छ। यो विभागको कुल खर्चको ५८ प्रतिशत हो। ठूला आयोजनामा केन्द्रित खर्चले निर्माण कार्यलाई गति दिन सहयोग पुगेको विभागको भनाइ छ। अन्य आयोजनातर्फ पनि प्रगति सन्तोषजनक देखिएको छ। दाङको प्रगन्ना–बड्कापथ सिँचाइ आयोजनाले ८८.२ प्रतिशत प्रगति गरेको छ। गहिरो ट्युबवेल सिँचाइ आयोजना र सिँचाइ संस्थागत विकास कार्यक्रमले भने पहिलो त्रैमासमै शतप्रतिशत लक्ष्य पूरा गरेका छन्। विभागका महानिर्देशक रजौरियाका अनुसार तयारी पूरा भएका आयोजनामा बजेट र निर्माण कार्यलाई एकसाथ अघि बढाइएको छ। पहिलो त्रैमासमा देखिएको प्रगतिलाई निरन्तरता दिँदै दोस्रो त्रैमासमा ढिलो गरी सुरु भएका आयोजनालाई पनि कार्यान्वयनको गतिमा ल्याउने विभागको योजना छ। पहिलो त्रैमासको खर्च र भौतिक प्रगतिले सिँचाइ क्षेत्रमा बजेट कार्यान्वयनको सुरुआत सकारात्मक देखाएको छ। तर, सबै आयोजनामा समान गति कायम राख्नु र ढिलो सुरु भएका आयोजनालाई समयमै कामको लयमा ल्याउनु विभागका लागि आगामी चुनौती हुनेछ।

News by सिँचाइ आयोजनामा पहिलो त्रैमासमै उत्साहजनक प्रगति, महाकाली सबैभन्दा अगाडि :