काठमाडौं– प्रधानमन्त्री वालेन्द्र शाहको आसन्न भारत भ्रमणमा नेपाल–भारतबीचको पूर्वाधार विकास र कनेक्टिभिटी विस्तार मुख्य एजेन्डा बन्ने भएको छ। भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री शाह आगामी मङ्सिर ६ गते दुई दिने औपचारिक भ्रमणका लागि भारत जान लागेका हुन्।
प्रधानमन्त्रीको भ्रमणलाई लक्षित गर्दै परराष्ट्र मन्त्रालयले आवश्यक तयारी तीव्र पारेको छ। मन्त्रालयका प्रवक्ता लोकबहादुर पौडेल क्षेत्रीले भ्रमणका विषयगत तयारी भइरहेको र विस्तृत कार्यक्रम चाँडै सार्वजनिक गरिने जानकारी दिएका छन्।
भ्रमणका क्रममा हवाई, रेल तथा सडक सञ्जाल विस्तारसँगै ऊर्जा पूर्वाधार, विकास सहायता र पर्यटन प्रवर्द्धनका विषयमा दुई देशबीच छलफल हुने तयारी छ। विशेषगरी नेपाललाई थप हवाई प्रवेश बिन्दु उपलब्ध गराउने, हवाई कनेक्टिभिटी विस्तार गर्ने र सीमापार पूर्वाधारलाई प्रभावकारी बनाउने विषय प्राथमिकतामा रहनेछन्।
रेलवे कनेक्टिभिटीअन्तर्गत जनकपुर–अयोध्या रेलसेवा सञ्चालन, जयनगर–जनकपुर रेलसेवालाई बर्दिबाससम्म विस्तार तथा रक्सौल–काठमाडौं रेलमार्गको सम्भावनाबारे छलफल हुने अपेक्षा गरिएको छ। त्यस्तै, सडक तथा पुल निर्माण, एकीकृत जाँच चौकी (आईसीपी) र विद्युत् प्रसारण लाइन विस्तारका विषय पनि एजेन्डामा समेटिनेछन्।
विकास निर्माणका क्षेत्रमा भारतीय सहयोगलाई थप प्रभावकारी बनाउने विषयले पनि भ्रमणमा प्राथमिकता पाउनेछ। भारतको सहयोगमा नेपालमा सञ्चालित आयोजनाहरूको प्रगति समीक्षा, सम्पन्न परियोजनाको उद्घाटन तथा हस्तान्तरण र निर्माणाधीन आयोजनालाई छिटो सम्पन्न गर्ने विषयमा छलफल हुने बताइएको छ।
यस क्रममा नेपाल प्रहरी प्रशिक्षण प्रतिष्ठानजस्ता सम्पन्न आयोजनाको उद्घाटन तथा हस्तान्तरण र केही नयाँ विकास परियोजना अघि बढाउने विषयसमेत उठ्ने सम्भावना छ। विपद्पछिको पुनर्निर्माणमा भारतीय सहयोग विस्तार गर्ने विषय पनि छलफलमा रहनेछ।
पूर्वाधारबाहेक पर्यटन प्रवर्द्धन, दुई देशका नागरिकबीचको सम्बन्ध विस्तार तथा सीमापार भुक्तानी प्रणालीलाई सहज र प्रभावकारी बनाउने विषयमा पनि दुवै पक्षबीच छलफल हुने अपेक्षा गरिएको छ।
प्रधानमन्त्री शाहको भ्रमणको तयारीका लागि भारतीय विदेशसचिव विक्रम मिश्रीले गत कात्तिक १८ र १९ गते नेपालको औपचारिक भ्रमण गरेका थिए। त्यस क्रममा उनले प्रधानमन्त्री शाहसहित विभिन्न मन्त्रीहरूसँग छुट्टाछुट्टै भेटवार्ता गरेका थिए।
त्यसैगरी, भ्रमणको पूर्वतयारीस्वरूप दुवै देशले रिक्त रहेका राजदूत पदमा नियुक्ति गरिसकेका छन्। नवनियुक्त राजदूतहरूले पनि भ्रमणलाई सफल बनाउन आ–आफ्नो तहबाट तयारी गरिरहेको सम्बन्धित दूतावासले जनाएका छन्।
प्रधानमन्त्रीको जिम्मेवारी सम्हालेपछि शाहले गत असोज ६ गते संयुक्त राष्ट्रसंघको ८१औँ महासभामा सहभागी हुन पहिलो विदेश भ्रमण गरेका थिए। आगामी भारत भ्रमण भने प्रधानमन्त्रीका रूपमा छिमेकी मुलुकमा हुन लागेको उनको पहिलो औपचारिक भ्रमण हुनेछ। त्यसैले यस भ्रमणलाई दुई देशबीचको सम्बन्ध र विकास साझेदारीलाई नयाँ गति दिने अवसरका रूपमा हेरिएको छ।