- 2026-11-15
- 08:28:36
- आइतबार,कार्तिक ३०, २०८३
काठमाडौँ — देशका विभिन्न भूभागमा पश्चिमी वायुको प्रभाव देखिन थालेसँगै केही स्थानमा वर्षा र हिमपात हुने सम्भावना रहेको छ। मौसममा आएको परिवर्तनका कारण विशेषगरी हिमाली तथा पहाडी क्षेत्रमा बादल लाग्ने र केही ठाउँमा मेघगर्जनसहित वर्षा हुन सक्ने मौसम पूर्वानुमान महाशाखाले जनाएको छ।
महाशाखाका अनुसार आज दिउँसो हिमाली क्षेत्रसहित कोशी, गण्डकी, कर्णाली र सुदूरपश्चिम प्रदेशका पहाडी भूभागमा सामान्यतया बादल लाग्नेछ। अन्य पहाडी तथा तराई क्षेत्रमा भने आंशिक बदली रहने अनुमान गरिएको छ।
विशेषगरी कर्णाली र सुदूरपश्चिम प्रदेशका हिमाली तथा पहाडी क्षेत्रका केही स्थानमा मेघगर्जन, चट्याङ र असिनासहित मध्यम वर्षा तथा हिमपात हुन सक्नेछ। त्यस्तै गण्डकी प्रदेशका केही स्थानमा पनि यस्तै मौसमी गतिविधि देखिन सक्नेछ। कोशी, बागमती र लुम्बिनी प्रदेशका हिमाली तथा पहाडी भूभागमा भने छिटफुट हल्का वर्षा र हिमपातको सम्भावना रहेको छ।
यसैगरी आज राति हिमाली क्षेत्रमा सामान्यतया बादल लाग्ने र कोशी प्रदेशसहित पहाडी भूभागमा आंशिक बदली रहने पूर्वानुमान छ। तराई, उपत्यका तथा खोँचका केही स्थानमा बिहानको समयमा हुस्सु र कुहिरो लाग्न सक्ने महाशाखाले जनाएको छ।
रातिको समयमा पनि हिमाली क्षेत्र तथा कोशी, गण्डकी र कर्णाली प्रदेशका पहाडी भूभागका एकदुई स्थानमा हल्का वर्षा र हिमपात हुन सक्ने सम्भावना छ।
मौसममा देखिएको सम्भावित परिवर्तनलाई मध्यनजर गर्दै महाशाखाले सर्वसाधारणलाई सतर्क रहन आग्रह गरेको छ। वर्षा, हिमपात, चट्याङ तथा असिनाबाट हुन सक्ने जोखिम कम गर्न आवश्यक सावधानी अपनाउन र मौसमसम्बन्धी पछिल्लो सूचना नियमित रूपमा लिन सम्बन्धित सबैलाई अनुरोध गरिएको छ।
Copyright © Aishworya Prakashan Pvt. Ltd. All Rights Reserved. Design & Developed by 
