- 2026-09-18
- 17:06:05
- शुक्रबार,आश्विन ०२, २०८३
काठमाडौँ– प्रधानमन्त्री वालेन्द्र शाहले जेन जेड पुस्ताका सांसदहरूलाई राजनीतिसँगै आफ्नो आयआर्जनको छुट्टै आधार निर्माण गर्न सुझाव दिएका छन्। उनले आर्थिक रूपमा आत्मनिर्भर राजनीतिक नेतृत्वले समाजमा सकारात्मक सन्देश दिन सक्ने बताएका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा जेन जेड सांसदहरूसँग भएको अन्तरक्रियामा प्रधानमन्त्री शाहले नयाँ पुस्ताले परम्परागत सोचभन्दा बाहिर गएर रोजगारी, उद्यमशीलता र आत्मनिर्भरताका क्षेत्रमा काम गर्नुपर्नेमा जोड दिए।
उनले राजनीतिलाई आम्दानीको मुख्य पेसा बनाउनेभन्दा पनि आफ्नै व्यावसायिक तथा आर्थिक आधार बलियो बनाउन सांसदहरूलाई आग्रह गरे। आर्थिक रूपमा आत्मनिर्भर भएपछि राजनीतिक भूमिकामा अझ प्रभावकारी रूपमा काम गर्न सकिने उनको भनाइ थियो।
नयाँ सोच र प्रविधिको प्रयोगमा जोड:
प्रधानमन्त्री शाहले जनजीविकासँग जोडिएका समस्या समाधान गर्न स्थलगत अध्ययन र अनुसन्धानमा ध्यान दिन सांसदहरूलाई सुझाव दिए। सूचना प्रविधिको अधिकतम प्रयोग गर्दै समस्या पहिचान र समाधानमुखी कार्यशैली अपनाउनुपर्ने उनले बताए।
परिवर्तित समय र नयाँ पुस्ताको आवश्यकताअनुसार परिणाम दिन नसक्ने पुराना तथा अव्यावहारिक सोच त्याग्नुपर्नेमा पनि उनले जोड दिए। नयाँ सम्भावनाको खोजी गर्दै व्यावहारिक र परिणाममुखी काम गर्नुपर्ने उनको भनाइ थियो।
स्वदेशमै अवसर सिर्जना गर्न आग्रह:
आफ्नै पुस्ताको प्रतिनिधित्व गर्दै संसद्मा पुगेका सांसदहरूले युवा पुस्ताका समस्या समाधानमा नेतृत्वदायी भूमिका निर्वाह गर्नुपर्ने प्रधानमन्त्री शाहले बताए।
विशेषगरी स्वदेशमै रोजगारीका अवसर सिर्जना गर्ने, युवालाई उद्यमशीलतातर्फ आकर्षित गर्ने र आत्मनिर्भर बनाउने अभियानमा जेन जेड सांसदहरू सक्रिय हुनुपर्ने उनको आग्रह थियो।
सुझावलाई मार्गदर्शनका रूपमा लिने प्रतिबद्धता:
अन्तरक्रियामा सहभागी जेन जेड उमेर समूहका सांसदहरूले प्रधानमन्त्री शाहका सुझावलाई अभिभावकीय मार्गदर्शनका रूपमा लिएको बताएका छन्।
उनीहरूले युवा पुस्तालाई आत्मनिर्भर बनाउने, स्वदेशमै रोजगारीका अवसर विस्तार गर्ने तथा नवीन सोच र प्रविधिको प्रयोगमार्फत परिणाममुखी काम गर्ने प्रतिबद्धता व्यक्त गरेका छन्।
Copyright © Aishworya Prakashan Pvt. Ltd. All Rights Reserved. Design & Developed by 
