काठमाडौँ– वाणिज्य बैंकहरूले भदौ महिनाका लागि नयाँ ब्याजदर सार्वजनिक गरेका छन्। सार्वजनिक विवरणअनुसार अधिकांश बैंकले साउनकै ब्याजदरलाई निरन्तरता दिँदा ५ वटा वाणिज्य बैंकले भने मुद्दती निक्षेपको ब्याजदर घटाएका छन्।

साउनको तुलनामा भदौमा व्यक्तिगत तथा संस्थागत दुवैतर्फको औसत मुद्दती निक्षेप ब्याजदर घटेको छ। २० वटा वाणिज्य बैंकमध्ये ५ वटाले अघिल्लो महिनाको तुलनामा ब्याजदर घटाएका छन् भने बाँकी १५ बैंकले पुरानै दरलाई निरन्तरता दिएका छन्। कुनै पनि वाणिज्य बैंकले भदौका लागि ब्याजदर बढाएका छैनन्।

ब्याजदर घटाउनेमा सिद्धार्थ बैंक र नेपाल बैंक अगाडि छन्। सिद्धार्थ बैंकले व्यक्तिगत मुद्दती निक्षेपको ब्याजदर ०.२९ प्रतिशत र संस्थागततर्फ ०.२० प्रतिशतले घटाएको छ। त्यस्तै, नेपाल बैंकले व्यक्तिगततर्फ ०.१० प्रतिशत र संस्थागततर्फ ०.५० प्रतिशतले ब्याजदर घटाएको छ।

त्यसैगरी, सिटिजन्स बैंक इन्टरनेसनलले व्यक्तिगत मुद्दती निक्षेपको ब्याजदर ०.१० प्रतिशतले घटाएको छ। कुमारी बैंकले व्यक्तिगततर्फ ०.०९ प्रतिशत र स्ट्यान्डर्ड चार्टर्ड बैंकले ०.०५ प्रतिशतले ब्याजदर घटाएका छन्। यी तीनवटै बैंकले संस्थागत मुद्दती निक्षेपको ब्याजदर भने साउनकै दरमा कायम राखेका छन्।

कुन बैंकले कति ब्याज दिँदैछन् ?

भदौमा व्यक्तिगत मुद्दती निक्षेपतर्फ सबैभन्दा धेरै ब्याजदर नबिल बैंक र प्रभु बैंकले दिने भएका छन्। दुवै बैंकले अधिकतम ४.५५ प्रतिशत ब्याजदर तोकेका छन्।

व्यक्तिगत मुद्दती निक्षेपमा सबैभन्दा कम ब्याजदर भने कुमारी बैंक र सिद्धार्थ बैंकको रहेको छ। यी बैंकले अधिकतम ३.७६ प्रतिशत ब्याजदर तोकेका छन्।

संस्थागत मुद्दती निक्षेपतर्फ नेपाल इन्भेष्टमेन्ट मेगा बैंक, एनएमबि बैंक, नेपाल बैंक, एभरेष्ट बैंक र हिमालयन बैंकले सबैभन्दा धेरै ३.५० प्रतिशत ब्याजदर दिने भएका छन्।

त्यस्तै, प्रभु बैंक, कृषि विकास बैंक, नेपाल एसबिआई बैंक, प्राइम कमर्सियल बैंक, ग्लोबल आइएमई बैंक र स्ट्यान्डर्ड चार्टर्ड बैंकले संस्थागत मुद्दती निक्षेपमा सबैभन्दा कम २.७५ प्रतिशत ब्याजदर तोकेका छन्।

भदौ महिनाका लागि बैंकहरूले तय गरेको ब्याजदर:

बैंक व्यक्तिगत मुद्दती संस्था
नबिल बैंक४.५५%
प्रभु बैंक४.५५%२.७५%
नेपाल इन्भेष्टमेन्ट मेगा बैंक—३.५०%
एनएमबि बैंक—३.५०%
नेपाल बैंक—३.५०%
एभरेष्ट बैंक—३.५०%
हिमालयन बैंक—३.५०%
कुमारी बैंक३.७६%
सिद्धार्थ बैंक३.७६%
कृषि विकास बैंक—२.७५%
नेपाल एसबिआई बैंक—२.७५%
प्राइम कमर्सियल बैंक—२.७५%
ग्लोबल आइएमई बैंक—२.७५%
स्ट्यान्डर्ड चार्टर्ड बैंक—२.७५%

बाँकी एनएमबि, सानिमा, माछापुच्छ्रे, लक्ष्मी सनराइज, एनआईसी एसिया, राष्ट्रिय वाणिज्यलगायतका बैंकहरूले पनि अघिल्लो महिनाकै ब्याजदरलाई निरन्तरता दिएका छन्।

यससँगै पछिल्ला महिनादेखि देखिँदै आएको बैंकिङ प्रणालीमा ब्याजदर घट्ने प्रवृत्ति भदौमा पनि कायम रहेको देखिएको छ।