काठमाडौं– चालु आर्थिक वर्ष २०८१–८२ को ८ महिना (साउन–फागुन) अवधिमा ५ सय ८६ विदेशीले नेपालमा श्रम स्वीकृति लिएको श्रम तथा व्यवसायजन्य सुरक्षा विभागकाले जानकारी दिएको छ ।
विभागका अनुसार फागुनमा मात्र ५५ विदेशीले यस्तो श्रम स्वीकृति लिएका छन्। नेपालमा श्रम स्वीकृति लिएर काम गर्नेमा धेरै चिनियाँ छन्। श्रम स्वीकृति लिनेमा बेलायत र अमेरिकाका समेत छन्।
यस वर्ष ८ महिनामा १ हजार ८१ विदेशीको श्रम स्वीकृति नवीकरण भएको छ। फागुनमा मात्र १ सय १३ विदेशीको श्रम स्वीकृति नवीकरण गरिएको विभागले जनाएको छ।
फागुनसम्म विभागले २६ प्रतिष्ठानमा अनुगमन गरेको छ। जसमा विदेशी श्रमिकले श्रम स्वीकृति लिए–नलिएको अनुगमन गरिएको समेत विभागले जनाएको छ। फागुनमा मात्र २ वटा अनुगमन गरिएको छ।