बाँकेमा विष्फोट, द्वन्द्वकालीन माइन भएको सुरक्षाकर्मीको अनुमान - Chaitanya News
  • 2026-11-19
  • 06:19:45
  • बिहिबार,मंसिर ०४, २०८३
  • बाँकेमा विष्फोट, द्वन्द्वकालीन माइन भएको सुरक्षाकर्मीको अनुमान

    बाँकेमा विष्फोट, द्वन्द्वकालीन माइन भएको सुरक्षाकर्मीको अनुमान

    काठमाडौं– बाँकेको राप्ती सोनारी गाउँपालिका–८, नयाँगाउँ नजिकै सडक किनारमा विष्फोटक पदार्थ विष्फोट भएको छ।

    उक्त विष्फोटक पदार्थ द्वन्द्वकालीन माइन हुनसक्ने अनुमान सुरक्षाकर्मीको टोलीले गरेको छ। विष्फोटका कारण राजमार्गको आधा खण्ड उडेको छ।

    आज बिहान नेपाली सेनासहितको सुरक्षाकर्मीको टोलीले विष्फोट भएको स्थानको अवलोकन गरेको थियो। सो टोलीले द्वन्द्वकालमा छाडिएको माइन विष्फोट भएको हुनसक्ने अनुमान गरेको जिल्ला प्रहरी कार्यालय बाँकेका प्रवक्ता एवम् डीएसपी नारायण डाँगीले जानकारी दिए।

    विष्फोट भएको स्थानमा खिया लागेको तारको टुक्रा र चुनजस्तो धुलो मात्र फेला परेको डीएसपी डाँगीले जानकारी दिए।

    विष्फोटबाट मानवीय क्षति भएको छैन। तर सडक किनारमा ठूलो खाल्डो परेका कारण सवारी साधन एकतर्फी मात्र सन्चालन भएका थिए। पछि सडक डिभिजन कार्यालयको टोली त्यो खाल्डो पुरेको र अहिले दुईतर्फी नै सडक सन्चालन भइरहेको जिल्ला प्रहरी कार्यालय बाँकेले जनाएको छ।