काठमाडौँ– नेकपा एमाले का राष्ट्रिय सभाका सांसद कुमार दसौदीले सुन तस्करी प्रकरणमा गृहमन्त्री र अर्थमन्त्री दुवै जना संलग्न रहेको बताएका छन्।आज (बुधबार) राष्ट्रिय सभा बैठकमा बोल्दै उनले यस्तो बताएका हुन्।
उच्चस्तरीय छानबिन समिति गठन गर्नुपर्ने अडानमा सरकार डराइरहेकाले पनि गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतको त्यसमा संलग्न भएको पुष्टि भएको उनको जिकिर थियो।
यस्तै सांसद दसौदीले आफ्नो पार्टीले पारदर्शी ढङ्गले राज्य सञ्चालन गर्नका लागि उच्चस्तरीय समिति गठन गरी सो प्रकरणको छानबिन गर्न माग गरेपनि संसद अवरुद्ध पार्ने मनसाय भने नराखेको बताए।
उनले भने, ‘हाम्रो संसद अवरुद्ध पार्ने कुनै मनसाय छैन। तर सरकार सुन तस्करी छानबिनका लागि तयार हुनुपर्छ। देश र जनताको हितका लागि त्यो छानबिन समिति आवश्यक छ। हामीलाई यो प्रकरणमा गृहमन्त्री र अर्थमन्त्रीमाथि नै गम्भीर आशङ्का छ। त्यसैले छानबिन समिति गठन गर्ने माग गर्नु परेको हो। तर, सरकार डराइरहेको छ।’