देशका अधिकांश स्थानमा वर्षा जारी - Chaitanya News
  • 2026-11-19
  • 01:47:54
  • बुधबार,मंसिर ०३, २०८३
  • देशका अधिकांश स्थानमा वर्षा जारी

    देशका अधिकांश स्थानमा वर्षा जारी

    काठमाडौं- देशका विभिन्न भूभागमा आज वर्षाको सम्भावना रहेको छ। केही प्रदेशमा भारी वर्षाको समेत सम्भावना रहेको छ।

    आज बिहान देशभर सामान्यदेखि पूर्ण बदली रहेको छ। कोसी, लुम्बिनी र सुदूरपश्चिम प्रदेशका थोरै र बाँकी प्रदेशका एकदुई स्थानमा हल्कादेखि मध्यम वर्षा भइरहेको छ।

    जल तथा मौसम विज्ञान विभागका अनुसार आज दिउँसो देशभर सामान्यदेखि पूर्ण बदली रहनेछ। कोसी, वाग्मती र गण्डकी प्रदेशका केही र बाँकी प्रदेशका थोरै स्थानमा हल्कादेखि मध्यम वर्षाको सम्भावना रहेको छ।

    वाग्मती, गण्डकी, लुम्बिनी र सुदूरपश्चिम प्रदेशका एकदुई स्थानमा मेघगर्जन र चट्याङसहित भारी वर्षाको समेत सम्भावना रहेको छ।

    विभागले आज राति देशभर सामान्य बदली रहने जनाएको छ। कोसी, मधेस, वाग्मती, गण्डकी र लुम्बिनी प्रदेशका केही र बाँकी प्रदेशको थोरै स्थानमा हल्कादेखि मध्यम वर्षाको सम्भावना रहेको छ।

    वाग्मती, गण्डकी र लुम्बिनी प्रदेशका एकदुई स्थानमा मेघगर्जन र चट्याङसहित भारी वर्षाको समेत सम्भावना रहेको विभागको भनाइ छ। कोसी र मधेस प्रदेशका थोरै स्थानमा हावाहुरीको पनि सम्भावना रहेको छ।

    भारी वर्षाका कारण नदीको जल सतह बढ्ने, गेग्रान बहाव, बाढी, पहिरो, भू–क्षयको सम्भाना रहेकाले सतर्क रहन विभागले आग्रह गरेको छ। जनस्वास्थ्य, कृषि, दैनिक जनजीवन, सडक तथा हवाई यातायात प्रभावित हुनसक्ने विभागको भनाइ छ।

    नेपालमा हाल मनसुनी वायुको साथै बंगलादेशको उत्तरी भू–भाग तथा आसपासमा रहेको न्यूनचापीय प्रणालीको प्रभाव रहेको छ। मनसुनको न्यूनचापीय रेखा सरदर स्थानभन्दा उत्तरतिर रहेको छ।

    त्यसैले अझै कम्तीमा तीन/चार दिनसम्म वर्षाको क्रम जारी रहने मौसमविद् सञ्जिव अधिकारी बताउँछन्। “अझै कम्तीमा तीन÷चार दिनसम्म वर्षा हुने देखिएको छ,” मौसमविद् अधिकारीले भने।