- 2026-11-16
- 03:26:18
- आइतबार,कार्तिक ३०, २०८३
काठमाडौं– प्रधानमन्त्री पुष्पकमल दाहाल प्रचण्डले भारतीय समकक्षी नरेन्द्र मोदीसँग दुई देशबीचको सीमा समस्या समाधानका लागि छलफल भएको बताएका छन।
भारतको चारदिने औपचारिक भ्रमणमा रहेका उनले आज नेपाली पत्रकारहरुसँग कुराकानी गर्दै सीमा समस्या सल्टाउने विषयमा आफू र भारतीय समकक्षीबीच कुराकानी भएको जानकारी दिएका हु्न। सो क्रममा उहाँले भारतीय प्रधानमन्त्री मोदीलाई सीमा विवाद थाँती राखेर दुई देशबीचको सम्बन्धमा ‘ब्रेक थ्रु’ हुन नसक्ने कुरा आफूले प्रष्टरुपमा राखेको पनि पत्रकारहरुलाई सुनाए।
अस्ति नयाँ दिल्ली पुग्नुभएका प्रचण्डले हिजो भारतीय समकक्षी मोदीसँगको ‘वान टु वान’ वार्ता गरेका थिए। लगत्तै दुई देशका प्रतिनिधिमण्डलस्तरीय वार्ता भएको थियो। त्यसपछि आयोजित संयुक्त पत्रकार सम्मेलनलाई सम्बोधन गरेका मोदीले सीमा समस्या समाधान गरिने बताएका थिए। ‘हाम्रो सम्बन्धलाई हिमालयजस्तै उचाई दिने काम गर्नेछौँ’, उनले भनेका थिए ‘यही भावनाका साथ सीमाको विषयमा होस् वा अरु केही सबै समाधान हुनेछ।’
आफूसँगको एकल वार्तामा पनि मोदीले सीमा विवाद समाधान गर्ने बताएको प्रधानमन्त्री प्रचण्डको भनाई छ। त्यसमा आफूले विशेष चासोका साथ कुरा उठाएको उनले बताए।
‘मैले मोदीजीलाई सीमा विवाद कायम राखेर दुई देशबीचको सम्बन्धमा ’ब्रेक थ्रु’ हुन सक्दैन भनेँ,’ नेपाली पत्रकारसँग मोदीसँगको भेटमा भएको कुराकानी उद्धृत गर्दै प्रधानमन्त्रीले भने, ‘मोदीजीले पनि नेपाल–भारत सम्बन्ध नयाँ उचाइमा पुग्ने विश्वास राख्नु भएको छ। उहाँले सीमा विवाद हल गर्ने विषय महत्वपूर्ण भएको र यसको समाधान गर्नुपर्छ भन्नुभएको छ।’
भारतीय प्रधानमन्त्रीले नेपालसँगको सीमा विवादबारे सार्वजनिक धारणा व्यक्त गरेको यो नै पहिलो पटक भएको बताइन्छ। नेपाली पक्षले भने नेपाल–भारत सीमा विवादलाई हरेक उच्चतहको भेटवार्तामा महत्वका साथ उठाउँदै आएको छ।
Copyright © Aishworya Prakashan Pvt. Ltd. All Rights Reserved. Design & Developed by 
