काठमाडौं– नेपाली राष्ट्रिय क्रिकेट टोलीका बलरको एकदिवसीय वरीयतामा सुधार आएको छ। अन्तर्राष्ट्रिय क्रिकेट परिषद् आईसीसीले अपडेट गरेको पछिल्लो वरीयतामा चारजना नेपाली बलर उक्लिएका हुन्।
लेगस्पिनर सन्दीप लामिछाने २ स्थान उक्लिएका छन्। उनी विश्व वरीयतामा २१औँ स्थानमा पुगेका छन्। सोमपाल कामीले ३ स्थान सुधार गरेका छन्। उनी ६०औँ स्थानमा उक्लिएका छन्। दीपेन्द्र सिंह ऐरी २ स्थान उक्लिएर ६३औँ स्थानमा पुगेका छन्।
करण केसीको पनि ३ स्थान सुधार भएको छ। उनी ९४औँ स्थानमा उक्लिएका छन्।
विश्व वरीयतामा भारतका मोहम्मद सिराज शीर्ष स्थानमा छन्। अस्ट्रेलियाका जोस हेजलवूड दोस्रो र न्युजिल्यान्डका ट्रेन्ट बोल्ट तेस्रो स्थानमा छन्।