- 2026-05-06
- 02:17:42
- मंगलबार,बैशाख २२, २०८३
काठमाडौं– रास्वपा सभापति रवि लामिछानेले आफ्नो मौनता आजसम्मका लागिमात्र भएको बताएका छन्। सामाजिक सञ्जालमा चेतावनीयुक्त स्टाटस लेख्दै उनले लेखेका छन्, ‘म अभिमन्यु होइन।’
अब मलाई भन्न बाँकी, गर्न बाँकी, लेख्न बाँकी केही भए भनीहाल्नुहोला, गरीहाल्नु होला, लेखिहाल्नु होला। मेरो मौनता आज सम्मका लागि मात्रै हो। म अभिमन्यु होइन’, लामिछानेले भनेका छन्।
नागरिकता विवादमा सर्वोच्चको फैसलापछि सांसद र मन्त्री गुमाएका रविको आइतबार नेपाली नागरिकता कायम भइसकेको छ। उनी पुन गृहमन्त्रालयमा फर्किन चाहेका छन् । तर, प्रधानमन्त्री पुष्पकमल दाहाल ‘प्रचण्ड’ उनलाई गृहमन्त्री दिन सकारात्मक छैनन् ।
गठबन्धनको प्रमुख घटक नेकपा एमालेका अध्यक्ष केपी शर्मा ओली भने रविको पक्षमा उभिएका छन्।
बिहीबार विराटनगर पुगेका ओलीले सञ्चारकर्मीसँग भने, ‘कुन कुन पार्टीले के(के लिन सहमति पहिल्यै भएको हो। त्यहीअनुसार जानुपर्छ। रास्वपाले पनि आफूले पाउनुपर्ने कुरा दिनुपर्छ। छलफल भइरहेको छ। खटपट भएको छैन । हामीले गृहमन्त्रालय उहाँहरूलाई दिएका हौँ। रास्वपाले गृहमन्त्री रवि लामिछानेलाई बनाएको थियो। उनीहरूलाई गृहमन्त्रालय नदिने छुट्टै कुरा भएको भए त्यसले अप्ठ्यारो पैदा गर्छ तर, त्यस्तो भएको छैन।’
माओवादीले गृहमन्त्रालयबारे निर्णयका लागि रविको फैसलाको पूर्णपाठ कुर्ने निर्णय गरेको छ । ओलीले भने, लामिछानेलाई गृहमन्त्री बनाउन पूर्णपाठ आवश्यक नपर्ने बताएका छन्।
‘किन चाहियो पूर्णपाठ? कण्ठ गर्ने हो र पूर्णपाठ? किन चाहियो पूर्णपाठ?’, ओलीको प्रश्न छ।
Copyright © Aishworya Prakashan Pvt. Ltd. All Rights Reserved. Design & Developed by 
