काठमाडौँ– विगत लामो समयदेखि औद्योगिक क्षेत्रको करोडौँ रकम बराबरको सरकारी जग्गा, भवन र पूर्वाधार प्रयोग गरेर भाडा र महसुल नतिर्ने ठूला उद्योगीमाथि सरकारले कठोर कदम चालेको छ। उद्योग, वाणिज्य तथा आपूर्ति मन्त्री गौरीकुमारी यादवले सात दिनभित्र बक्यौता रकम भुक्तानी नगरे कडा कदम चाल्ने तयारी गरेकी छिन्। विगतका सरकारले विभिन्न बहाना बनाउँदै र सेटिङ गर्दै ठूला उद्योगीलाई जोगाउँदै आएकामा वर्तमान उद्योग मन्त्री यादवले ‘भनसुन र मोलाहिजा’ को राजनीति अन्त्य गर्दै कठोर कदम चालेको उनको सचिवालयले जनाएको छ। औद्योगिक क्षेत्र व्यवस्था लिमिटेडले सोमबार सार्वजनिक सूचनाअनुसार बालाजु औद्योगिक क्षेत्रभित्र सञ्चालित नेपालकै नाम चलेका बहुराष्ट्रिय कम्पनी तथा ठूला व्यापारिक घराना नै सबैभन्दा बढी बक्यौता राख्ने सूचीमा छन्। कुन उद्योगको कति रकम तिर्न बाँकी ? १– गुराँस इन्जिनियर्स प्राइभेट लिमिटेड रु. तीन करोड ७३ लाख १९ हजार २– कन्टिनेन्टल कम्पोनेन्ट एण्ड सर्भिसेज प्रालिको रु. तीन करोड ६९ लाख १० हजार ३– बालाजु स्कुल अफ इन्जिनियरिङ एण्ड टेकको रु. दुई करोड ५५ लाख ८६ हजार ४– बोटलर्स नेपाल लिमिटेड (कोकाकोला)जग्गा तथा पूर्वाधार बहाल रु. एक करोड ७५ लाख ५– बालाजु अटो वक्र्स प्रालिको रु. एक करोड ४५ लाख ६– नेपाल ग्यास उद्योग औद्योगिक जग्गा बहाल रु. एक करोड ३१ लाख ७– कन्टिनेन्ट सर्भिसेज प्राइभेट लिमिटेड रु. करिब एक करोड ‘मौन संरक्षण’ अन्त्य यसअघिका सरकारहरूले औद्योगिक प्रवर्द्धन र आर्थिक मन्दीको बहाना बनाउँदै यी ठूला घरानाहरूलाई करोडौँको छुट दिने वा ताकेता नगर्ने नीति अख्तियार गरेको बुझिएको छ। तर, नयाँ उद्योग मन्त्री यादवले राज्यको कोषमा आउनुपर्ने राजस्व र भाडामा कुनै पनि हालतमा सम्झौता नगर्ने स्पष्ट अडान लिएका छन्। मन्त्री यादवले भनिन्, “यो पटक विगतको जस्तो पत्र काटेर मात्र छोडिने छैन। सात दिनको समयभित्र बैंक भौचरसहित उपस्थित नहुने उद्योगहरूको लाइन काटिनेछ, उद्योग परिसर सिल गरिनेछ र अटेर गरे सञ्चालकहरूविरुद्ध सिधै वारेन्ट जारी गरी राज्यको सम्पत्ति असुली प्रक्रिया अघि बढाइनेछ।” उद्योगहरूले नियमित रूपमा जग्गा बहाल, भवन बहाल, विद्युत् महशुल र पानी महशुल नबुझाउँदा औद्योगिक क्षेत्रभित्र नयाँ पूर्वाधार निर्माण गर्न, पुराना संरचना मर्मतसम्भार गर्न र साना उद्योगलाई समेत सेवा दिन गम्भीर आर्थिक संकट परेको कुरा जारी सूचनामा उल्लेख छ।


