काठमाडौँ– नेपाल विद्युत् प्राधिकरणले विद्युत् वितरण लाइन भूमिगत गर्ने कामलाई तीव्रता दिँदै काठमाडौँ र ललितपुरका विभिन्न क्षेत्रमा विद्युत् आपूर्ति बन्द गर्ने भएको छ । प्राधिकरणले मंसिर ३ गतेदेखि १४ गतेसम्म विभिन्न स्थानमा दैनिक ६ घण्टासम्म विद्युत् कटौती गर्ने तालिका सार्वजनिक गरेको छ ।
प्राधिकरणका अनुसार कुलेश्वर र बानेश्वर वितरण केन्द्रअन्तर्गतका विभिन्न फिडरमा बिहान १०ः३० बजेदेखि दिउँसो ४ बजेसम्म विद्युत् आपूर्ति बन्द हुनेछ ।
निर्धारित तालिकाअनुसार मंसिर ३, ६ र ८ गते नैकापको बल्खु खोला पुल क्षेत्रमा विद्युत् आपूर्ति रोकिनेछ । मंसिर ४ गते लुम्बिनीदेखि शिफल ग्राउन्डसम्म र ५ गते स्युचाटार पुल क्षेत्रमा विद्युत् अवरुद्ध हुनेछ ।
त्यस्तै, मंसिर ७ गते कोटेश्वर–इमाडोल फिडरअन्तर्गत ईडीटीआर ९ र ९ए क्षेत्रमा विद्युत् आपूर्ति बन्द हुनेछ । कोटेश्वर फिडरअन्तर्गत मंसिर ९ गते ईडीटीआर २६ए र ४ तथा मंसिर १२ गते ईडीटीआर ८ए र ८ मा विद्युत् कटौती गरिने प्राधिकरणले जनाएको छ ।
मंसिर १० र १४ गते शिफल ग्राउन्डदेखि कालोपुलसम्म विद्युत् आपूर्ति बन्द हुनेछ । यसैगरी, मंसिर ११ गते सतुङ्गलदेखि ढुङ्गे अड्डासम्म र १३ गते बलम्बुदेखि सगरमाथा स्याटेलाइट स्टेसनसम्म विद्युत् सेवा अवरुद्ध हुने सूचनामा उल्लेख छ ।
प्राधिकरणले विद्युत् वितरण प्रणालीलाई व्यवस्थित तथा भरपर्दो बनाउन लाइन भूमिगत गर्ने काम गर्न लागेको जनाएको छ । निर्धारित कार्यतालिका मौसमको प्रतिकूलताका कारण परिवर्तन वा रद्द हुन सक्ने पनि प्राधिकरणले स्पष्ट पारेको छ ।
विद्युत् आपूर्ति बन्द हुँदा उपभोक्तामा पर्न जाने असुविधाप्रति प्राधिकरणले क्षमासमेत मागेको छ ।
