काठमाडौं– नेकपा एमालेका अध्यक्ष केपी शर्मा ओलीले वर्तमान सरकार जनताप्रति उत्तरदायी बन्न नसकेको आरोप लगाउँदै सरकारको कार्यशैलीप्रति असन्तुष्टि व्यक्त गरेका छन्। सरकारसँग पर्याप्त स्रोतसाधन भए पनि जनताका समस्या समाधान गर्न नसकेको उनको आरोप छ।
काठमाडौंमा आयोजित राष्ट्रिय भेलालाई सम्बोधन गर्दै पूर्वप्रधानमन्त्री ओलीले वर्तमान अवस्थामा राज्यका निकायहरू प्रभावकारी रूपमा काम गर्न नसकिरहेको टिप्पणी गरे। उनले देशको संस्कृति, सभ्यता, अस्मिता र स्वाधीनताको रक्षाका लागि जनता नै अघि बढ्नुपर्ने अवस्था आएको बताए।
ओलीले सरकारको प्राथमिकतामाथि प्रश्न उठाउँदै पीडित नागरिक दुःखमा रहे पनि उनीहरूको समस्या समाधानका लागि प्रभावकारी काम हुन नसकेको बताए। सरकारसँग खर्बौं रुपैयाँ भए पनि त्यसको उपयोग हुन नसकेको उनको भनाइ थियो।
शिक्षा र स्वास्थ्य क्षेत्रको अवस्था पनि सुधार हुन नसकेको भन्दै उनले अस्पतालबाट बाहिर निकालिएका महिलाले सडकमा बच्चा जन्माउनुपर्ने अवस्था रहेको उदाहरण प्रस्तुत गरे।
‘जनताप्रति अनुत्तरदायी सरकार, खर्बौं पैसा जम्मा भएको छ, त्यो पैसा थन्किएर बसेको छ, पीडितहरू दुःखमा पिल्सिरहेका छन्,’ ओलीले भने।
उनले संसद् विघटनसम्बन्धी मुद्दामा अदालतको भूमिकामाथि पनि प्रश्न उठाए। राज्यका विभिन्न अंग र निकायले आफ्नो जिम्मेवारी पूरा गर्न नसकेको उनको आरोप थियो।
जेनजी विद्रोहको बहाना बनाएर तालिमप्राप्त अपराधी परिचालन गरी वितण्डा मच्चाइएको दाबी गर्दै ओलीले जनतालाई झुक्याउने काम भएको टिप्पणी गरे। उनले देशको अस्मिता, स्वाधीनता, स्वाभिमान र सम्मानको रक्षा गर्न नागरिक सचेत हुनुपर्नेमा जोड दिए।
यसैबीच, ओलीले प्रधानमन्त्री बालेन्द्र शाहको संसद्मा उपस्थित हुने शैली र संसद्मा दिएका अभिव्यक्तिमाथि पनि आपत्ति जनाए। प्रधानमन्त्रीले संसद्मा आउनुपर्ने समयमा उपस्थित नभएको तथा नेपालले ठूलो देशको सीमा मिचेको भन्ने अभिव्यक्ति दिएको भन्दै उनले त्यसप्रति असन्तुष्टि व्यक्त गरे।
उनले उक्त अभिव्यक्ति संसद्को अभिलेखबाट हटाउनुपर्ने विषयसमेत नउठेको भन्दै सभामुखको भूमिकामाथि प्रश्न गरे।
ओलीको सम्बोधनमा सरकारको कार्यशैली, राज्यका निकायको भूमिका, शिक्षा तथा स्वास्थ्य क्षेत्रको अवस्था र राष्ट्रिय स्वाधीनताको विषय प्रमुख रूपमा उठेका थिए।