काठमाडौं– निर्जीवन बीमा व्यवसाय विस्तार भइरहे पनि कम्पनीहरूको नाफामा भने ठूलो दबाब देखिएको छ। आर्थिक वर्ष २०८२/८३ मा सञ्चालनमा रहेका १४ निर्जीवन बीमा कम्पनीको समग्र खुद नाफा अघिल्लो आर्थिक वर्षको तुलनामा करिब ४० प्रतिशतले घटेको वित्तीय विवरणले देखाएको छ।

कम्पनीहरूले सार्वजनिक गरेको वित्तीय विवरणअनुसार आर्थिक वर्ष २०८२/८३ मा १४ कम्पनीले कुल २ अर्ब ७९ करोड १५ लाख रुपैयाँ खुद नाफा कमाएका छन्। अघिल्लो आर्थिक वर्षमा यही समूहको कुल नाफा ४ अर्ब ५९ करोड २२ लाख रुपैयाँ थियो। यस हिसाबले एक वर्षमै निर्जीवन बीमा क्षेत्रको समग्र नाफा १ अर्ब ८० करोड रुपैयाँभन्दा बढीले घटेको छ।

नाफामा आएको यो गिरावटले बीमा कम्पनीहरूबीचको प्रतिस्पर्धा, खर्च व्यवस्थापन र व्यवसायको गुणस्तरमा देखिएको दबाबलाई संकेत गरेको छ। अधिकांश कम्पनीको नाफा घट्दा केही कम्पनी भने उल्लेख्य सुधार गर्न सफल भएका छन्।

ओरियन्टलको पुनरागमन, नाफामा पहिलो स्थान:

नाफाको आकारका आधारमा सबैभन्दा ठूलो छलाङ ओरियन्टल इन्स्योरेन्सले मारेको छ। अघिल्लो आर्थिक वर्षमा ११ करोड ७६ लाख रुपैयाँ नोक्सानमा रहेको कम्पनीले आर्थिक वर्ष २०८२/८३ मा ४९ करोड ४ लाख रुपैयाँ खुद नाफा कमाएको छ।

नोक्सानबाट नाफामा फर्किएसँगै ओरियन्टल यस वर्ष सबैभन्दा बढी खुद नाफा कमाउने निर्जीवन बीमा कम्पनी बनेको छ। एक वर्षअघिको घाटाबाट कम्पनीले गरेको यो सुधार क्षेत्रकै उल्लेख्य परिवर्तनका रूपमा देखिएको छ।

तर अर्कोतर्फ नेसनल इन्स्योरेन्सको अवस्था भने अझै कमजोर छ। अघिल्लो वर्ष १५ करोड ७ लाख रुपैयाँ घाटामा रहेको कम्पनीले समीक्षा वर्षमा पनि १३ करोड १० लाख रुपैयाँ नोक्सान व्यहोरेको छ। १४ कम्पनीमध्ये नेसनल इन्स्योरेन्स मात्र घाटामा रहेको छ।

प्रभुको नाफा बढ्दा अधिकांश कम्पनी दबाबमा:

नाफा कमाउने कम्पनीमध्ये प्रभु इन्स्योरेन्सले भने अन्य कम्पनीको प्रवृत्तिभन्दा फरक प्रदर्शन गरेको छ। कम्पनीको खुद नाफा १९.७१ प्रतिशतले बढेर २४ करोड ६४ लाख रुपैयाँ पुगेको छ। अघिल्लो आर्थिक वर्षमा प्रभुको नाफा २० करोड ५८ लाख रुपैयाँ थियो।

तर प्रभुबाहेक नाफामा रहेका अन्य कम्पनीको नाफा घटेको छ। अधिकांश कम्पनीमा नाफा घट्ने दर दोहोरो अंकमा छ भने केही कम्पनीको नाफामा ९० प्रतिशतभन्दा बढीको गिरावट आएको छ।

सलिको र राष्ट्रिय बीमा कम्पनी पनि दबाबमा:

ओरियन्टलपछि सबैभन्दा धेरै नाफा कमाउने कम्पनीमा सलिको (सगरमाथा लुम्बिनी) रहेको छ। तर कम्पनीको नाफा अघिल्लो वर्षको तुलनामा ३२.७५ प्रतिशतले घटेर ३७ करोड ५६ लाख रुपैयाँमा सीमित भएको छ।

राष्ट्रिय बीमा कम्पनी ३४ करोड ४४ लाख रुपैयाँ नाफासहित तेस्रो स्थानमा छ। यसको नाफा पनि अघिल्लो वर्षको तुलनामा १९.४६ प्रतिशतले घटेको छ।

त्यस्तै, हिमालयन एभरेस्टले ३३ करोड ७८ लाख, सिद्धार्थ प्रिमियरले ३२ करोड ६८ लाख र नेको इन्स्योरेन्सले २८ करोड ८३ लाख रुपैयाँ खुद नाफा कमाएका छन्। यी कम्पनीको नाफा क्रमशः ३६.५३ प्रतिशत, ५६.७५ प्रतिशत र ५०.१९ प्रतिशतले घटेको छ।

आइजिआइ प्रुडेन्सियलको नाफा ९९ प्रतिशत नजिक घट्यो:

प्रतिशतका आधारमा सबैभन्दा ठूलो गिरावट आइजिआइ प्रुडेन्सियल इन्स्योरेन्सको नाफामा देखिएको छ। अघिल्लो आर्थिक वर्षमा ३६ करोड ४९ लाख रुपैयाँ खुद नाफा कमाएको कम्पनीको नाफा समीक्षा वर्षमा ९८.८९ प्रतिशतले घटेर ४० लाख ३८ हजार रुपैयाँमा सीमित भएको छ।

शिखर इन्स्योरेन्सको नाफा पनि ७१.२२ प्रतिशतले घटेर १३ करोड रुपैयाँमा झरेको छ। सानिमा जिआइसीको नाफा ६१.३९ प्रतिशतले घटेर १३ करोड रुपैयाँ, नेपाल इन्स्योरेन्सको ५९.६९ प्रतिशतले घटेर १२ करोड ७५ लाख रुपैयाँ, युनाइटेड अजोडको ६४.५५ प्रतिशतले घटेर ६ करोड ३० लाख रुपैयाँ र एनएलजी इन्स्योरेन्सको नाफा ६२.३१ प्रतिशतले घटेर ५ करोड ७८ लाख रुपैयाँमा सीमित भएको छ।

नाफा घट्नुले के देखाउँछ?

एक वर्षमा १४ निर्जीवन बीमा कम्पनीको कुल नाफा करिब ३९.२१ प्रतिशतले घट्नु सामान्य उतारचढावभन्दा ठूलो परिवर्तन हो। अझ अधिकांश कम्पनीको नाफा घट्नुले समग्र निर्जीवन बीमा क्षेत्रमा नाफा कायम राख्ने चुनौती बढेको देखाउँछ।

यद्यपि कम्पनीहरूको वित्तीय अवस्था एउटै छैन। ओरियन्टल इन्स्योरेन्स नोक्सानबाट ठूलो नाफामा फर्किएको छ भने प्रभु इन्स्योरेन्सले नाफा बढाएको छ। अर्कोतर्फ आइजिआइ प्रुडेन्सियलसहित केही कम्पनीको नाफा अत्यधिक घटेको छ र नेसनल इन्स्योरेन्स अझै घाटामै छ।

यसले निर्जीवन बीमा क्षेत्रमा कम्पनीपिच्छे व्यवसायको अवस्था, आम्दानी तथा खर्च व्यवस्थापन र नाफा आर्जन क्षमतामा ठूलो अन्तर रहेको देखाएको छ। अब आगामी आर्थिक वर्षमा कम्पनीहरूले घट्दो नाफाको दबाबलाई कसरी व्यवस्थापन गर्छन् भन्ने विषय महत्वपूर्ण बन्नेछ।