७० अर्ब पुग्यो वाणिज्य बैंकहरूको नाफा, कुन बैंकको अवस्था कस्तो? - Chaitanya News
  • 2026-11-17
  • 09:55:48
  • मंगलबार,मंसिर ०२, २०८३
  • ७० अर्ब पुग्यो वाणिज्य बैंकहरूको नाफा, कुन बैंकको अवस्था कस्तो?

    ७० अर्ब पुग्यो वाणिज्य बैंकहरूको नाफा, कुन बैंकको अवस्था कस्तो?

    काठमाडौँ–  सञ्चालनमा रहेका २० वाणिज्य बैंकहरूको कुल खुद नाफा करिब ७० अर्ब रुपैयाँ पुगेको छ। सार्वजनिक भएको आर्थिक वर्ष २०८२/८३ को वित्तीय विवरणअनुसार बैंकहरूले कुल ६९ अर्ब ८८ करोड ६१ लाख रुपैयाँ खुद नाफा आर्जन गरेका छन्।

    यो अघिल्लो आर्थिक वर्ष २०८१/८२ को तुलनामा ३२.३२ प्रतिशतले बढी हो। अघिल्लो आर्थिक वर्षमा वाणिज्य बैंकहरूको कुल खुद नाफा ५२ अर्ब ८१ करोड ७५ लाख रुपैयाँ रहेको थियो।

    नबिल बैंकको सर्वाधिक नाफा

    समग्र बैंकिङ क्षेत्रको नाफामा सुधार आउँदा Nabil Bankले सर्वाधिक खुद नाफा कमाएको छ। नबिल बैंकले अघिल्लो आर्थिक वर्षको तुलनामा ३३.५० प्रतिशतले नाफा बढाउँदै यस वर्ष ७ अर्ब ९० करोड ५८ लाख रुपैयाँ खुद नाफा आर्जन गरेको छ।

    त्यस्तै, कुमारी बैंक ७ अर्ब ३८ करोड ७२ लाख रुपैयाँ खुद नाफासहित दोस्रो स्थानमा रहेको छ। ग्लोबल आईएमई बैंक ६ अर्ब २२ करोड ७२ लाख रुपैयाँ नाफासहित तेस्रो स्थानमा छ।

    प्रभु बैंक नोक्सानमा, चार बैंकको नाफा घट्यो

    बैंकहरूको समग्र नाफामा उल्लेख्य वृद्धि भए पनि एक बैंक भने नोक्सानमा गएको छ। यस अवधिमा प्रभु बैंकले २४ करोड १२ लाख रुपैयाँ खुद नोक्सान व्यहोरेको छ। अघिल्लो आर्थिक वर्षमा ८७ करोड २३ लाख रुपैयाँ खुद नाफा कमाएको प्रभु बैंक यसपटक घाटामा गएको हो।

    त्यस्तै, चार बैंकको खुद नाफा अघिल्लो आर्थिक वर्षको तुलनामा घटेको छ। लक्ष्मी सनराइज बैंकको नाफा २२.७७ प्रतिशत, स्ट्यान्डर्ड चार्टर्ड बैंकको ५.३९ प्रतिशत, नेपाल इन्भेस्टमेन्ट मेगा बैंकको ३६.५९ प्रतिशत र कृषि विकास बैंकको नाफा २९.५२ प्रतिशतले घटेको छ।

    यता, अघिल्लो आर्थिक वर्षमा ३ अर्ब ८७ करोड २० लाख रुपैयाँ खुद नोक्सानमा रहेको एनआईसी एशिया बैंकले भने यस वर्ष सुधार गर्दै १८ करोड १७ लाख रुपैयाँ खुद नाफा कमाएको छ।

    हिमालयन र कुमारीको नाफामा ठूलो उछाल

    प्रतिशतका आधारमा सबैभन्दा धेरै नाफा वृद्धि गर्ने बैंकमा हिमालयन बैंक रहेको छ। अघिल्लो आर्थिक वर्षमा १२ करोड ९७ लाख रुपैयाँ खुद नाफा कमाएको हिमालयन बैंकको नाफा यस वर्ष १०४१.४० प्रतिशतले बढेर १ अर्ब ४८ करोड ४ लाख रुपैयाँ पुगेको छ।

    त्यसैगरी, कुमारी बैंकको खुद नाफा ३०५.९६ प्रतिशतले बढेको छ। समग्रमा अधिकांश वाणिज्य बैंकहरूको खुद नाफा बढेको वित्तीय विवरणले देखाएको छ।

    यसले चालु आर्थिक वर्षमा वाणिज्य बैंकहरूको समग्र वित्तीय अवस्थामा सुधार आएको देखाए पनि केही बैंकको नाफामा आएको गिरावट र प्रभु बैंकको नोक्सानीले बैंकहरूबीचको वित्तीय प्रदर्शन भने समान नरहेको देखाउँछ।