प्रहरीले सबैसँग शिष्ट र मर्यादित व्यवहार गर्नुपर्ने गरी ऐन प्रतिनिधि सभाबाट संशोधन - Chaitanya News
  • 2026-11-16
  • 16:10:16
  • सोमबार,मंसिर ०१, २०८३
  • प्रहरीले सबैसँग शिष्ट र मर्यादित व्यवहार गर्नुपर्ने गरी ऐन प्रतिनिधि सभाबाट संशोधन

    प्रहरीले सबैसँग शिष्ट र मर्यादित व्यवहार गर्नुपर्ने गरी ऐन प्रतिनिधि सभाबाट संशोधन

    काठमाडौं– प्रहरीले शिष्ट र मर्यादित व्यवहार गर्नुपर्ने गरी प्रचलित ऐन प्रतिनिधि सभाबाट संशोधन हुने भएको छ। सरकारले केही नेपाल ऐन संशोधन विधेयकमार्फत प्रहरी ऐन २०१२ मा संशोधन गर्न लागेको हो ।

    प्रतिनिधि सभाबाट पारित भएको केही नेपाल ऐन संशोधन विधेयकले प्रहरी ऐन २०१२ को दफा १५ र दफा ३६ मा संशोधन गरेको छ। दफा १५ मा संशोधन गर्दै प्रहरीले सेवाग्राही र सबैसँग शिष्ट र मर्यादित व्यवहार गर्नुपर्ने भनिएको छ। दफा ३६ मा प्रहरी विशेष अदालतको स्थापना र गठन सम्बन्धी व्यवस्था छ।

    दफा ३६ को (ख) मा प्रहरी नायव निरीक्षकदेखि प्रहरी नायव उपरीक्षक सम्मको लागि क्षेत्रीय प्रहरी विशेष अदालत गठन हुने व्यवस्था छ। यसलाई बदलेर नयाँ विधेयकले क्षेत्रीय भन्ने शब्दको सट्टा प्रदेश भन्ने शब्द राखेको छ। अर्थात, प्रहरी विशेष अदालत प्रदेश स्तरमा स्थापना हुने गरी ऐन संशोधन भएको हो। यस्तो अदालत प्रदेश अन्तर्गत नरहेर संघीय संरचना अन्तर्गत नै रहनेछ।

    केही नेपाल ऐन संशोधन विधेयक अघिल्लो सरकारको पालामा तत्कालीन कानुन, न्याय तथा संसदीय मामिला मन्त्री धनराज गुरुङले ल्याएका थिए।

    २६ वैशाख २०८० मा यो विधेयक प्रतिनिधि सभामा दर्ता भएको थियो। दफावार छलफलका लागि प्रतिनिधि सभाले विषयगत समितिमा २९ भदौ २०८० मा पठाइएको थियो। समितिबाट पास भएर सभामा १४ वैशाख २०८१ मा पुगेको थियो।

    अब यो विधेयक राष्ट्रिय सभामा जान्छ। राष्ट्रिय सभाले पारित गरेपछि पुनः प्रतिनिधि सभामा आउँछ। सभामुख हुँदै राष्ट्रपतिकहाँ पुग्छ। राष्ट्रपतिले प्रमाणीकरण गरेपछि ऐनको रुपमा कार्यान्वयनमा आउनेछ।