विपद्को एक वर्ष: आठ हजार भन्दा बढी घटनामा ७४५ जनाको मृत्यु - Chaitanya News
  • 2026-11-16
  • 18:50:39
  • सोमबार,मंसिर ०१, २०८३
  • विपद्को एक वर्ष: आठ हजार भन्दा बढी घटनामा ७४५ जनाको मृत्यु

    विपद्को एक वर्ष: आठ हजार भन्दा बढी घटनामा ७४५ जनाको मृत्यु

    काठमाडौँ–  गएको एक वर्षमा विपद्जन्य घटनामा ७४५ जनाको ज्यान गएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार एक वर्षमा आठ हजार ८६१ वटा विपद्का घटना घटेको र ती घटनामा परी ७४५ जनाको मृत्यु भएको हो।

    ती घटनामा परी ६९ जना बेपत्ता भएका र एक हजार ७०२ जना घाइते भएका प्राधिकरणका प्रवक्ता रामबहादुर केसीले जानकारी दिए। उनका अनुसार एक वर्षमा विपदबाट १८ हजार ९९१ घरपरिवार प्रभावित हुन पुगेका छन्। कुल रु. तीन अर्ब १३ करोड बराबरको आर्थिक क्षति भएको प्राधिकरणले जनाएको छ।

    कुन घटनामा कति मानवीय क्षति ?
    सबैभन्दा बढी पहिरोका कारण ३५१ जनाको ज्यान गएको छ। त्यसपछि बाढीबाट ९७, चट्याङबाट ७८ र आगलागीबाट ७७ जनाको मृत्यु भएको प्राधिकरणले जनाएको छ। भारी वर्षाका कारण आठ, जनावरको आक्रमणबाट ४३, लेक लागेर २४, हवाई दुर्घटनामा २३, सर्पदंशबाट १९ जनाको मृत्यु भएको छ।

    त्यसै गरी, डढेलोबाट १०, हुरीबतासका कारण सात, डुंगा पल्टेर एक र अन्य विविध कारणबाट सात जनाको मृत्यु भएको छ। पहिरोबाट ४८, बाढीबाट १८ र हिउँ पहिरोमा परेर तीन जना बेपत्ता भएका छन्।

    सबैभन्दा बढी आगलागीका घटना:
    विपद्जन्य घटनाका सङ्ख्या अध्ययन गर्दा सबैभन्दा बढी आगलागीका घटना यस वर्ष भएका छन्। बि.सं.२०८१ वैशाख १ देखि चैत २९ गतेसम्मको तथ्यांकानुसार आगलागीका मात्र चार हजार १४५ वटा घटना भएका छन्। त्यसपछि डढेलोका एक हजार १९५ वटा र पहिरोका एक हजार पाँच घटना भएको छ।

    त्यस्तै बाढी ४१८, भारीका वर्षाका ५६८, चट्याङका ४१८, जनावर आक्रमणका ४७७, लेक लागेका १११ वटा घटना भएका छन्। हवाई दुर्घटनाका दुई, सर्पदंशका ८४, हावाहुरीका ३४९, डुंगा पल्टेका एक, हिउँ पहिरोका छ, भूकम्पका ७४, असिना पानी एक र अन्य सात वटा विपद्जन्य घटना भएको प्राधिकरणले सार्वजनिक गरेको विवरणमा उल्लेख छ।