गौर हत्याकाण्डका पीडितसँग वार्ताका क्रममा प्रधानमन्त्रीले भने: पीडितलाई न्याय दिलाउँछौँ - Chaitanya News
  • 2026-11-16
  • 23:00:55
  • सोमबार,मंसिर ०१, २०८३
  • गौर हत्याकाण्डका पीडितसँग वार्ताका क्रममा प्रधानमन्त्रीले भने: पीडितलाई न्याय दिलाउँछौँ

    गौर हत्याकाण्डका पीडितसँग वार्ताका क्रममा प्रधानमन्त्रीले भने: पीडितलाई न्याय दिलाउँछौँ

    काठमाडौँ– प्रधानमन्त्री पुष्पकमल दाहाल ‘प्रचण्ड’ले रौतहटको गौर हत्याकाण्डका पीडितलाई न्याय दिलाउने बताएका छन्। आज (शनिबार) प्रधानमन्त्री निवास बालुवाटारमा पीडितहरूसँगको क्रममा उनले यस्तो बताएका हुन्। यस्तै उनले पीडितसँग वार्ताका लागि छिट्टै गृह सचिवको संयोजकत्वमा समिति समेत बनाउने बताए।

    सोह्र वर्ष अघि गौरमा भएको घटनामा परेर तत्कालीन नेकपा (माओवादी) का २७ कार्यकर्ताको निधन भएको थियो। सो घटनाका पीडितले विभिन्न माग राखी आन्दोलनका कार्यक्रम सार्वजनिक गरेपछि प्रधानमन्त्री दाहालले वार्तामार्फत समस्याको समाधान गर्ने प्रतिबद्धता जनाएका छन्। प्रधानमन्त्री दाहालको निजी सचिवालयका सहसचिव अर्जुन भण्डारीले यही साउन १८ गते पीडित सङ्घर्ष समितिका रुपसागर उपाध्यायलाई वार्तामा आउन आग्रह गर्दै पत्राचार गरेका थिए।

    गौर हत्याकाण्ड पीडित सङ्घर्ष समितिका माध्यमबाट विभिन्न मागसहित आन्दोलन गर्ने जानकारीप्रति प्रधानमन्त्रीको ध्यानाकर्षण भएको छ। सङ्घर्ष समितिका मागका सम्बन्धमा वार्ता–संवादका माध्यमबाट तत्काल समाधान गर्न प्रधानमन्त्री दाहालबाट निर्देशनसमेत भएकाले आन्दोलनका कार्यक्रम फिर्ता लिई वार्ता–संवादमा आउन हार्दिक अनुरोध छ”, उक्त पत्रमा उल्लेख छ।