प्रधानन्यायाधीश नियुक्ति सिफारिस छिट्टै गर्ने, प्रचण्ड, ओली र देउवाबीच सहमति - Chaitanya News
  • 2026-11-17
  • 05:23:42
  • सोमबार,मंसिर ०१, २०८३
  • प्रधानन्यायाधीश नियुक्ति सिफारिस छिट्टै गर्ने, प्रचण्ड, ओली र देउवाबीच सहमति

    प्रधानन्यायाधीश नियुक्ति सिफारिस छिट्टै गर्ने, प्रचण्ड, ओली र देउवाबीच सहमति

    काठमाडौं– प्रधानन्यायाधीश नियुक्ति सिफारिसका लागि संवैधानिक परिषदको बैठक बोलाउने प्रमुख तीन दलमा शीर्ष नेताहरुबीच सहमति भएको छ।

    आज (आइतबार) बालुवाटारमा प्रधानमन्त्री प्रचण्ड, नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीच छलफल भएको थियो।

    छलफलका क्रममा संवैधानिक परिषद्को बैठक राखेर प्रधानन्यायाधीश नियुक्तिका लागि सिफारिस गर्ने र संसदलाई प्रभावकारी बनाउने विषयमा छलफल भएको प्रधानमन्त्रीका प्रेस सल्लाहकार गोविन्द आचार्यले जानकारी दिए।

    छलफलमा प्रधानमन्त्री प्रचण्डले संवैधानिक परिषद्का अन्य सदस्यसँग छलफल गरेर छिट्टै परिषद् बैठक बोलाउने बताएका थिए। परिषद्को बैठकको मिति भने तोकिएको छैन।

    प्रधानन्यायाधीश हरिकृष्ण कार्कीको पदावधि साउन २० गते सकिंदैछ। प्रधानन्यायाधीशको कार्यकाल सकिन एक महिनाअघि नै प्रधानन्यायाधीश नियुक्ति सिफारिस गर्नुपर्ने संवैधानिक व्यवस्था भए पनि हालसम्म संवैधानिक परिषद्को बैठक बस्न सकेको छैन।