काठमाडौँ — नेपाली कांग्रेसकी केन्द्रीय सदस्य नांगिना यादवले पार्टीमा महिलाको नेतृत्व अस्वीकार गर्ने अभ्यास अझै कायम रहेको बताएकी छिन्। आज (बुधबार) केन्द्रीय समिति बैठकमा बोल्दै यस्तो बताएकी हुन्। यस्तै उनले महिलालाई पार्टीको मूलधारमा ल्याएर नेतृत्वमा नपुर्याए पार्टी झन् कमजोर बन्न सक्ने बताइन्।
नेता यादवले सत्य युगमा महिलाको शासन रहेको सुनेर पूजा गर्ने समाजमा कलियुग आइपुग्दासमेत महिलाको नेतृत्व भने स्वीकार्य नहुनु अनौठो कुरा भएको बताइन्। ‘पार्टीभित्र क्षमता र प्रतिस्पर्धा गर्न सक्ने सक्षम महिलाहरू धेरै छन्। तर उनको नेतृत्व पार्टीले स्वीकारेको छैन। जबकि सत्य युगमा अर्थमन्त्री लक्ष्मी हुनुहुन्थ्यो, शिक्षामन्त्री सरस्वती हुनुहुन्थ्यो, रक्षामन्त्री दुर्गा हुनुहुन्थ्यो, त्यो सत्ता हाम्रो लागि अहिले पनि पूजनीय छ,’ उनले अघि भनिन्, ‘अहिले कलियुगमा भने महिलाको नेतृत्व स्वीकार्न तयार भएको अवस्था छैन। पार्टीमा गाउँदेखि केन्द्रसम्म महिलाको नेतृत्व स्वीकारिएको छैन।
उनले पार्टीले क्षमता विकास गर्ने र अवसर दिने कुरामा महिलालाई प्राथमिकतामा राख्ने व्यवस्था गर्न माग गरिन्।