वर्तमान सरकार राष्ट्रका साझा मुद्दामा कमजोर : उपमहासचिव ज्ञवाली - Chaitanya News
  • 2026-11-16
  • 12:38:52
  • सोमबार,मंसिर ०१, २०८३
  • वर्तमान सरकार राष्ट्रका साझा मुद्दामा कमजोर : उपमहासचिव ज्ञवाली

    वर्तमान सरकार राष्ट्रका साझा मुद्दामा कमजोर : उपमहासचिव ज्ञवाली

    अछाम– नेकपा (एमाले) का उपमहासचिव प्रदीपकुमार ज्ञवालीले वर्तमान सरकार राष्ट्रका साझा मुद्दामा कमजोर रहेको बताएका छन। अछाम सदरमुकाम मंगलसेनमा प्रेस चौतारीले आज गरेको पत्रकार सम्मेलनमा उनले सो कुरा बताएका हुन।

    राष्ट्रिय एकता, अर्थतन्त्र र समातामुलक समाज निर्माण र देशको अस्थिरता हटाउनुमाभन्दा सत्ता टिकाएर स्वार्थ पूरा गर्नमा सरकार लागेको उनले बताए। “राष्ट्रका साझा मुद्दामा राष्ट्रिय एकता हुन सकेको छैन, अर्थतन्त्र धरासायी हुँदैछ। राजनीति अस्थितरतातिर जाँदैछ त्यसमा सरकारलाई चिन्ता देखिएन” ज्ञवालीले भने।

    प्रधानमन्त्रीको भारत भ्रमणमा सीमा समस्या, १९५० को असमान सन्धी, ईपीजी प्रतिवेदन, हवाइ रुटका बारेमा सम्झौता हुन नसके पनि भारतले आफ्नो चाहना पूरा गरेको भनाइ राखे।

    आफ्नो पार्टी वर्तमान सरकार ढाल्ने पक्षमा हाल नभएको भन्दै सरकारकै कारण देश संकटतिर गएको बताए । पत्रकारको प्रश्नमा ज्ञवालीले काँग्रेस भित्रका केही नेताहरु पनि सरकार परिवर्तनको पक्षमा रहे पनि निर्णायक हुन नसकेको बताए।

    देशमा हुने सबै प्रकारका भ्रष्टाचारलगायतका सुशासनविरुद्धका काम छानविनमा आफ्नो पार्टी दृढतापूर्वक सरकारलाई सहयोग गर्न तयार रहेको उनको भनाइ छ। तर राजनीतिक वा अन्य तरिकाले पूर्वाग्राही नभइ प्रहरी र अदालतलाई स्वतन्त्रपूर्वक काम गर्न दिनुपर्ने बताए।

    उपमहासचिव ज्ञवालीले मदन भण्डारीको जन्मजयन्तीको अवसरमा अछाम अस्पतालमा रहेका बिरामीलाई फलफुल वितरण गरे। ज्ञवाली नेकपा (एमाले) अछामद्वारा आयोजित जिल्लास्तरीय प्रशिणका लागि अछाम पुगेका छन।