चैतन्य सम्बाददाता, Author at Chaitanya News - Page 2 of 1153
  • 2026-11-22
  • 19:15:32
  • आइतबार,मंसिर ०७, २०८३

About Author

सगरमाथा क्षेत्रमा पर्यटकको चाप घट्दै, एक सातामै १ हजार १८० जना बाहिरिए

सोलुखुम्बु — हिउँद नजिकिएसँगै सगरमाथा क्षेत्रको पर्यटन गतिविधि सुस्ताउन थालेको छ। उच्च हिमाली क्षेत्रमा तापक्रम घटेर चिसो बढ्न थालेपछि खुम्बु क्षेत्र घुम्न पुगेका पर्यटक फर्कने क्रम तीव्र बनेको छ। पछिल्लो एक सातामा हवाई मार्गबाट भित्रिनेभन्दा बाहिरिने पर्यटकको सङ्ख्या दोब्बरभन्दा बढी देखिएको छ। जिल्ला प्रहरी कार्यालय सोलुखुम्बुको साप्ताहिक तथ्याङ्कअनुसार पछिल्लो सात दिनमा हवाई मार्ग हुँदै एक हजार १८० पर्यटक खुम्बु क्षेत्रबाट बाहिरिएका छन्। सोही अवधिमा ५२९ पर्यटक मात्रै प्रवेश गरेका छन्। यसरी भित्रिनेको तुलनामा बाहिरिने पर्यटक ६५१ जना बढी रहेका छन्। बाहिरिने पर्यटकमध्ये ८७७ विदेशी र ३०३ नेपाली छन्। त्यस्तै, खुम्बु क्षेत्रमा प्रवेश गर्नेमा ३७४ विदेशी र १५५ नेपाली पर्यटक रहेका छन्। प्रहरीका सूचना अधिकारी प्रहरी निरीक्षक मौसम तामाङका अनुसार बाहिरिने विदेशी पर्यटकमध्ये ३२७ महिला र ५५० पुरुष छन्। नेपाली पर्यटकतर्फ ४६ महिला र २५७ पुरुष बाहिरिएका छन्। प्रवेश गर्ने विदेशीमध्ये १०२ महिला र २७२ पुरुष छन् भने नेपालीमध्ये ५४ महिला र १०१ पुरुष रहेका छन्। स्थानीयका अनुसार खुम्बु क्षेत्रमा राति र बिहानको तापक्रम माइनसमा झर्न थालेपछि चिसोको प्रभाव बढेको छ। स्थानीय दाली शेर्पाले नाम्चे क्षेत्रमा समेत पानी जम्न थालेको बताउँदै तापक्रम घटेसँगै पर्यटक फर्कने क्रम बढेको जानकारी दिए। सगरमाथा क्षेत्रको मुख्य पर्यटकीय सिजनका रूपमा रहेको शरद् ऋतुमा असोज र कात्तिक महिनामा पर्यटकको चाप बढी हुने गर्छ। मनसुनपछि मौसम सफा हुने, हिमाल स्पष्ट देखिने र पदयात्राका लागि अनुकूल वातावरण बन्ने भएकाले यो समयमा स्वदेशी तथा विदेशी पर्यटकको आगमन उल्लेख्य हुने गरेको छ। तर, कात्तिकको उत्तरार्धसँगै चिसो बढ्ने र हिमपातको सम्भावना रहने भएकाले पर्यटकले यात्रा छोट्याउन थाल्छन्। सगरमाथा प्रदूषण नियन्त्रण समिति (एसपिसिसी)का अध्यक्ष तथा पर्यटन व्यवसायी लामाकाजी शेर्पाका अनुसार उच्च हिमाली क्षेत्रमा तापक्रम घट्दा पर्यटकको बसाइ अवधि र गतिविधिमा असर पर्ने गर्छ। मौसम, हिमपातको सम्भावना र पदयात्राको अवस्थालाई ध्यानमा राखेर पर्यटकले आफ्नो यात्रा व्यवस्थापन गर्ने भएकाले सिजनको अन्त्यतिर बाहिरिने क्रम बढ्ने उनको भनाइ छ। पर्यटन व्यवसायी स्पिडकाजी शेर्पाले पनि जाडो सुरु भएसँगै उच्च हिमाली क्षेत्रमा यात्रा कठिन हुने र पर्यटकको सङ्ख्या घट्दै जाने बताए। पर्यटकको आवागमन मौसमसँग प्रत्यक्ष जोडिएकाले यसको प्रभाव होटल, पसल, पदयात्रा सेवा तथा अन्य पर्यटन व्यवसायमा समेत देखिन थालेको स्थानीयको अनुभव छ। लुक्लास्थित तारा एयरका स्टेसन इन्चार्ज अमृत मगरका अनुसार पर्यटकको चाप र मौसमी अवस्थाले हवाई उडानमा प्रभाव पार्ने गरेको छ। पर्यटकको आवागमन बढ्दा उडान गतिविधि बढ्ने र सिजन कमजोर हुँदै जाँदा बाहिरिने पर्यटकको सङ्ख्या बढ्ने उनले बताए। प्रहरीको विवरणअनुसार पछिल्लो सात दिनमा खुम्बु क्षेत्रमा ६९ वटा विमान तथा २८ वटा हेलिकप्टर उडान भएका छन्। उच्च हिमाली क्षेत्रमा हवाई सेवा पर्यटक आवागमनको महत्वपूर्ण माध्यम भएकाले मौसमको अवस्थाले उडान गतिविधिमा समेत प्रभाव पार्ने गरेको छ। सगरमाथा आधार शिविर, नाम्चे बजार, खुम्जुङ, गोक्यो, थामे र लुक्लालगायत क्षेत्र सगरमाथा क्षेत्रका प्रमुख पर्यटकीय गन्तव्य हुन्। यहाँ वसन्त र शरद् गरी वर्षमा दुई मुख्य पर्यटन सिजनमा पर्यटकको चाप बढी हुने गर्छ। वसन्त सिजन फागुनदेखि जेठसम्म र शरद् सिजन भदौको अन्त्यदेखि मङ्सिरसम्म रहने पर्यटन व्यवसायी बताउँछन्। खुम्बु पासाङ ल्हामु गाउँपालिका–४ का वडाध्यक्ष लक्ष्मण अधिकारीका अनुसार शरद् सिजन सकिँदै जाँदा तापक्रम घट्ने र मौसममा परिवर्तन आउने भएकाले पर्यटन गतिविधि क्रमशः कम हुँदै जान्छ। उच्च हिमाली क्षेत्रमा चिसो बढेसँगै पर्यटक तल्लो क्षेत्रतर्फ फर्कने क्रम अझै बढ्न सक्ने पर्यटन व्यवसायी तेम्बाछिरि शेर्पाको अनुमान छ। पछिल्लो साप्ताहिक तथ्याङ्कमा प्रवेश गर्नेभन्दा बाहिरिने पर्यटकको सङ्ख्या उल्लेख्य रूपमा बढी देखिनुले सगरमाथा क्षेत्रको शरद् पर्यटन सिजन अन्तिम चरणमा पुगेको सङ्केत गरेको छ।

News by सगरमाथा क्षेत्रमा पर्यटकको चाप घट्दै, एक सातामै १ हजार १८० जना बाहिरिए :