धनगढीः चैतन्य पाठशालाको आयोजनामा सञ्चालन भएको चैतन्य अन्तरविद्यालयस्तरीय शिक्षक फुटसल प्रतियोगिता–२०८३ को उपाधि सुदूरवेधा टिमले जितेको छ। प्रतियोगिताको फाइनलमा उत्कृष्ट प्रदर्शन गर्दै सुदूरभेदाले उपाधि आफ्नो पक्षमा पार्न सफल भएको हो। फाइनलमा पराजित वाल्मिकि स्कुल उपविजेतामा सीमित बनेको छ।

विभिन्न २१ विद्यालयका शिक्षकहरूको सहभागिता रहेको प्रतियोगिता लिग चरणदेखि क्वालिफायर, सेमिफाइनल र फाइनलसम्म आइपुग्दा प्रतिस्पर्धात्मक र रोमाञ्चक बनेको थियो। प्रतियोगितामा सहभागी टोलीहरूले खेल कौशल, टिमवर्क, अनुशासन र प्रतिस्पर्धात्मक भावना प्रदर्शन गरेका थिए।

उपाधि जितेसँगै सुदूरवेधाले नगद ५० हजार रुपैयाँसहित ट्रफी, स्वर्ण पदक र प्रमाणपत्र प्राप्त गरेको छ। त्यसैगरी, उपविजेता वाल्मिकि स्कुलले नगद २५ हजार रुपैयाँसहित ट्रफी, पदक र प्रमाणपत्र प्राप्त गरेको छ।

लिग चरणदेखि नै प्रतिस्पर्धात्मक बनेको प्रतियोगिता
प्रतियोगिताको पहिलो दिन विभिन्न विद्यालयका शिक्षक टोलीबीच खेल सञ्चालन भएका थिए। पहिलो दिन सम्पन्न खेलमध्ये १५ खेलमा विजेता टोलीको टुङ्गो लागेको थियो भने उद्घाटन खेल सुदूरवेधा र वाल्मिकिबीच बराबरीमा सकिएको थियो।

उद्घाटन खेलमा दुवै टोलीले प्रतिस्पर्धात्मक प्रदर्शन गर्दै गोलका लागि प्रयास गरे पनि खेल बराबरीमा टुङ्गिएको थियो। त्यसपछि भएका खेलहरूमा भने विभिन्न टोलीले जित निकाल्दै प्रतियोगितामा आफ्नो उपस्थिति बलियो बनाएका थिए।

पहिलो दिनको दोस्रो खेलमा नास्टले विद्या भूषणलाई पराजित गरेको थियो। तेस्रो खेलमा सत्यवतीले एक्सिसलाई हराउँदा चौथो खेलमा नेपाल पुलिसले सैनिकलाई पराजित गरेको थियो। पाँचौँ खेलमा नास्टले गार्डनरलाई हराउँदै प्रतियोगितामा दोस्रो जित दर्ता गरेको थियो।

त्यसैगरी, छैटौँ खेलमा स्टेपिङले चैतन्य ‘ए’ लाई पराजित गरेको थियो। सातौँ खेलमा गार्डनरले विद्या भूषणलाई हराउँदा आठौँ खेलमा एलायन्सले ऐश्वर्यमाथि जित हासिल गरेको थियो।

पहिलो दिनको नवौँ खेलमा मयूरले एरिस्टोलाई पराजित गरेको थियो भने दशौँ खेलमा सिसिएसले सैनिकलाई हराएको थियो। एघारौँ खेलमा सत्यवतीले शैलेश्वरीलाई पराजित गर्दै दोस्रो जित हात पारेको थियो।

बाह्रौँ खेलमा सिसिएसले नेपाल पुलिसलाई हराउँदा तेह्रौँ खेलमा एलायन्सले डिलाइटलाई पराजित गरेको थियो। चौधौँ खेलमा मयूरले डिस्कभरीलाई हराएको थियो भने पन्ध्रौँ खेलमा वाल्मिकिले अपीलाई पराजित गर्दै जित निकालेको थियो ।

पहिलो दिनको अन्तिम अर्थात् सोह्रौँ खेलमा एक्सिसले शैलेश्वरीलाई पराजित गरेसँगै पहिलो दिनका खेल सम्पन्न भएका थिए। पहिलो दिनका खेलहरूले प्रतियोगितामा सहभागी टोलीहरूको प्रतिस्पर्धात्मक क्षमता र अर्को चरणमा पुग्ने सम्भावनालाई थप रोचक बनाएका थिए।

दोस्रो दिनका खेलले तय गर्‍यो क्वालिफायरको समीकरण
प्रतियोगिताको दोस्रो दिन बिहान लिग चरणअन्तर्गतका खेलहरू सञ्चालन भएका थिए। ती खेलले क्वालिफायर चरणमा पुग्ने टोलीहरूको समीकरणलाई थप स्पष्ट बनाएका थिए।

दोस्रो दिन सम्पन्न खेलमा सुदूरभेदाले अपीलाई पराजित गरेको थियो। त्यसैगरी, चैतन्य ‘बी’ ले चैतन्य ‘ए’ लाई हराएको थियो भने एरिस्टोले डिस्कभरीलाई पराजित गरेको थियो। अर्को खेलमा स्टेपिङले चैतन्य ‘बी’ माथि जित हासिल गरेको थियो।

लिग चरणका खेलहरू सम्पन्न भएपछि प्रतियोगिता क्वालिफायर चरणमा प्रवेश गरेको थियो। यस चरणमा स्थान बनाएका टोलीहरूले सेमिफाइनलमा पुग्न निर्णायक प्रतिस्पर्धा गरेका थिए।

क्वालिफायरमा एलायन्स, वाल्मिकि, सुदूरभेदा र मयूर सफल
क्वालिफायर चरणका खेलहरूमा एलायन्स, बाल्मिकी, सुदूरवेधा र मयूरले उत्कृष्ट प्रदर्शन गर्दै सेमिफाइनलमा स्थान सुरक्षित गरेका थिए।

क्वालिफायरको पहिलो खेलमा एलायन्सले सत्यवतीलाई पराजित गर्दै सेमिफाइनलको यात्रा तय गरेको थियो। प्रतिस्पर्धात्मक खेलमा जित निकाल्दै एलायन्सले उपाधि यात्रालाई अगाडि बढाएको थियो।

त्यसैगरी, अर्को खेलमा नास्टलाई पराजित गर्दै वाल्मिकि स्कुल सेमिफाइनलमा प्रवेश गरेको थियो। लिग चरणका खेलमा आफ्नो क्षमता देखाएको वाल्मिकिले क्वालिफायरमा समेत जित निकाल्दै उपाधि दाबेदारी प्रस्तुत गरेको थियो।

अर्को क्वालिफायर खेलमा सुदूरवेधाले आफ्नो प्रतिस्पर्धी टोलीलाई पराजित गर्दै अन्तिम चारमा स्थान बनाएको थियो। लिग चरणमा समेत प्रभावशाली प्रदर्शन गरेको सुदूरवेधाले निर्णायक खेलमा जित हासिल गर्दै उपाधि यात्रालाई निरन्तरता दिएको थियो।

त्यसैगरी, सिसिएसलाई हराउँदै मयूरले पनि सेमिफाइनलमा आफ्नो स्थान सुरक्षित गरेको थियो। यससँगै प्रतियोगिताको सेमिफाइनलमा एलायन्स, वाल्मिकि, सुदूरवेधा र मयूरबीच उपाधिका लागि प्रतिस्पर्धा गर्ने समीकरण बनेको थियो।

सेमिफाइनलपछि सुदूरवेधा र वाल्मिकि फाइनलमा
क्वालिफायर चरण पार गरेका चार टोलीबीच सेमिफाइनलका खेल सञ्चालन भएका थिए । सेमिफाइनलमा उत्कृष्ट प्रदर्शन गर्दै सुदूरवेधा र बाल्मिकी स्कुलले फाइनलमा स्थान सुरक्षित गरेका थिए।

प्रतियोगिताभर उत्कृष्ट खेल प्रदर्शन गर्दै आएका टोलीमध्ये सुदूरवेधा र वाल्मिकि फाइनलमा पुगेपछि उपाधि भिडन्तलाई लिएर खेलप्रेमीहरूमा थप उत्साह देखिएको थियो। दुवै टोलीले फाइनलसम्मको यात्रा तय गर्न विभिन्न चरणका प्रतिस्पर्धात्मक खेल पार गरेका थिए।

सुदूरवेधाले लिग चरणदेखि नै देखाएको खेल कौशललाई निर्णायक चरणमा समेत निरन्तरता दिएको थियो। वाल्मिकि स्कुलले पनि उत्कृष्ट प्रदर्शन गर्दै फाइनलसम्मको यात्रा तय गरेको थियो।

फाइनलमा सुदूरवेधाको बाजी, वाल्मिकि उपविजेता
प्रतियोगिताको उपाधिका लागि सुदूरवेधा र वाल्मिकी स्कुलबीच फाइनल खेल भएको थियो। दुवै टोली उपाधि जित्ने लक्ष्यसहित मैदानमा उत्रिएका थिए। फाइनलमा खेलाडीहरूको तालमेल, पासिङ, बलमाथिको नियन्त्रण र गोल गर्ने प्रयासले प्रतिस्पर्धालाई थप रोमाञ्चक बनाएको थियो।

अन्ततः सुदूरवेधा वाल्मिकि स्कुललाई पराजित गर्दै प्रतियोगिताको उपाधि जित्न सफल भयो। वाल्मिकि स्कुलले उपाधि जित्न नसके पनि फाइनलसम्मको यात्रा तय गर्दै प्रतियोगितामा उत्कृष्ट प्रदर्शन गरेको थियो।

प्रतियोगिताको विजेता सुदूरभेदाले नगद ५० हजार रुपैयाँ, ट्रफी, स्वर्ण पदक र प्रमाणपत्र प्राप्त गरेको छ। उपविजेता वाल्मिकि स्कुलले नगद २५ हजार रुपैयाँ, ट्रफी, पदक र प्रमाणपत्र प्राप्त गरेको छ।

शिक्षकबीच सद्भाव र सहकार्य अभिवृद्धि गर्ने उद्देश्य
चैतन्य पाठशालाले आयोजना गरेको यस प्रतियोगिताको मुख्य उद्देश्य विभिन्न विद्यालयमा कार्यरत शिक्षकहरूबीच आपसी सद्भाव, भाइचारा, सहकार्य र खेलकुदप्रतिको रुचि अभिवृद्धि गर्नु रहेको चैतन्य पाठशालाका अध्यक्ष गणेश प्रसाद जोशीले बताए ।

शिक्षकहरू नियमित रूपमा शिक्षण तथा शैक्षिक गतिविधिमा व्यस्त रहने भएकाले यस्ता खेलकुद प्रतियोगिताले उनीहरूलाई शारीरिक तन्दुरुस्ती कायम राख्न, मानसिक स्फूर्ति बढाउन र सहकर्मीसँग आत्मीय सम्बन्ध विस्तार गर्न सहयोग पुर्‍याउने अपेक्षा गरिएको छ।

उनले भने ‘खेलकुदले व्यक्तिमा अनुशासन, धैर्य, नेतृत्व क्षमता, सामूहिक भावना र स्वस्थ प्रतिस्पर्धाको संस्कार विकास गर्न महत्त्वपूर्ण भूमिका खेल्छ। विशेषगरी विभिन्न विद्यालयका शिक्षकहरूलाई एउटै मैदानमा सहभागी गराउँदा आपसी परिचय, अनुभव आदानप्रदान र सहकार्यको वातावरण निर्माण गर्न सहयोग पुग्छ।’

खेलकुदमार्फत एकता र सकारात्मक प्रतिस्पर्धाको सन्देश
चैतन्य पाठशालाको आयोजनामा सम्पन्न प्रतियोगिताले खेलकुदलाई मनोरञ्जन र प्रतिस्पर्धामा मात्र सीमित नराखी विद्यालय समुदायबीच एकता, सहकार्य र आपसी सम्मान अभिवृद्धि गर्ने माध्यमका रूपमा स्थापित गर्ने प्रयास गरेको पाठशालाका प्राचार्य प्रेमनिधि ओझाले बताए।

लिग चरणदेखि क्वालिफायर, सेमिफाइनल र फाइनलसम्म सहभागी टोलीहरूले देखाएको खेलभावना, अनुशासन र प्रतिस्पर्धाले प्रतियोगितालाई थप आकर्षक बनाएको र प्रतियोगितामा सहभागी खेलाडी, विद्यालय, आयोजक, रेफ्री तथा सहयोगीहरूको योगदानले कार्यक्रम सफल बनाउन महत्त्वपूर्ण भूमिका खेलेको पाठशालाका निर्देशक कटक ब. सिंहले बताए ।

यससँगै चैतन्य अन्तरविद्यालयस्तरीय शिक्षक फुटसल प्रतियोगिता–२०८३ सफलतापूर्वक सम्पन्न भएको छ। प्रतियोगितामा सुदूरभेदाले उपाधि जित्दै आफ्नो उत्कृष्टता प्रमाणित गरेको छ भने बाल्मिकी स्कुल उपविजेता बनेको छ।

विजेता र उपविजेता दुवै टोलीलाई शुभकामना दिँदै शिक्षा तथा सामाजिक क्षेत्रमा उत्कृष्ट कार्य गर्दै आएको चैतन्य पाठशालाले खेल क्षेत्रमा गरेको यो प्रयासका लागि पाठशालालाई धन्यवाद दिँदै जितहार कसैको नभई सम्पूर्ण शिक्षकहरूको जित भएको कैलाली जिल्ला फुटबल सङ्घका अध्यक्ष अनिल मल्लले बताएका छन्।