काठमाडौँ– नेपाल आउने विदेशी पर्यटकका लागि नेपालमा डिजिटल भुक्तानीको दायरा थप विस्तार भएको छ। मास्टरकार्डले नेपालको डिजिटल वालेट तथा एकीकृत क्यूआर भुक्तानी प्लेटफर्म मोकोसँग सहकार्य गर्दै विदेशी कार्डबाटै नेपालका क्यूआर मर्चेन्टमा भुक्तानी गर्न सकिने सेवा सञ्चालनमा ल्याएको हो।

मास्टरकार्डको ‘पे लोकल’ सेवामार्फत विदेशी पर्यटकले आफ्नो मास्टरकार्डलाई ‘मोको ट्राभल एप’मा लिंक गरेर नेपालपे र फोनपेका क्यूआर मर्चेन्टमा भुक्तानी गर्न सक्नेछन्। एप एप्पल एप स्टोर र गुगल प्ले स्टोरबाट डाउनलोड गर्न सकिनेछ।

यसअघि नेपालमा आउने विदेशी पर्यटकका लागि स्थानीय डिजिटल भुक्तानी प्रणाली प्रयोग गर्न नगद सटही, प्रिपेड सुविधा वा अन्य वैकल्पिक माध्यमको आवश्यकता पर्ने गरेको थियो। नयाँ व्यवस्थाले भने पर्यटकलाई आफूले प्रयोग गर्दै आएको डेबिट वा क्रेडिट कार्डकै माध्यमबाट दैनिक कारोबार गर्न सहज बनाउने अपेक्षा गरिएको छ।

होटल, रेस्टुरेन्ट, खुद्रा पसल, स्थानीय बजार तथा पर्यटकीय क्षेत्रका व्यवसायमा रहेका क्यूआरमार्फत भुक्तानी गर्न सकिने भएकाले पर्यटकका लागि नगद बोक्ने र मुद्रा साट्ने झन्झट कम हुनेछ। यसले विशेषगरी विदेशी पर्यटकको डिजिटल भुक्तानी अनुभवलाई स्थानीय प्रणालीसँग जोड्ने काम गर्नेछ।

यो सेवाबाट पर्यटक मात्र नभई स्थानीय व्यवसायीसमेत लाभान्वित हुने अपेक्षा गरिएको छ। व्यवसायीले नयाँ छुट्टै भुक्तानी पूर्वाधार निर्माण नगरी विद्यमान क्यूआर प्रणालीमार्फत विदेशी ग्राहकबाट भुक्तानी लिन सक्नेछन्। यसले पर्यटनसँग जोडिएका साना तथा ठूला व्यवसायमा डिजिटल कारोबार विस्तार गर्न सहयोग पुग्नेछ।

मास्टरकार्डका कन्ट्री म्यानेजर सन्दुन हापुगोडाले अन्तर्राष्ट्रिय पर्यटकले यात्राका क्रममा सहज, सुरक्षित र सुविधाजनक भुक्तानी खोज्ने भएकाले मोकोसँगको सहकार्यले नेपालको क्यूआर इकोसिस्टममा विदेशी कार्ड प्रयोगलाई सहज बनाउने बताए।

उनका अनुसार पर्यटकले आफूले बोकेको मास्टरकार्डकै माध्यमबाट नेपालका विभिन्न क्यूआर मर्चेन्टमा भुक्तानी गर्न सक्ने भएकाले यात्राका क्रममा भुक्तानीसम्बन्धी झन्झट कम हुनेछ।

फोकसवान पेमेन्ट सोलुसन्सका प्रमुख कार्यकारी अधिकृत प्रणय राजभण्डारीले पनि मोको ट्राभल एपमार्फत विदेशी पर्यटकलाई नेपालको क्यूआर भुक्तानी प्रणालीमा सहज पहुँच उपलब्ध हुने बताए। उनका अनुसार यसबाट पर्यटकको भुक्तानी अनुभव सुधारिनुका साथै स्थानीय मर्चेन्टलाई अन्तर्राष्ट्रिय ग्राहकसँग कारोबार गर्न थप अवसर मिल्नेछ।

मास्टरकार्डले ‘पे लोकल’ सेवा यसअघि चीन, इन्डोनेसिया, मलेसिया, कम्बोडिया र श्रीलंकालगायतका एसियाली मुलुकमा सञ्चालनमा ल्याइसकेको छ। नेपालमा समेत यो सेवा सुरु भएपछि पर्यटन क्षेत्रमा डिजिटल भुक्तानीलाई अन्तर्राष्ट्रिय कार्ड प्रणालीसँग जोड्ने बाटो खुलेको छ।

नेपालमा पर्यटकको आगमनसँगै डिजिटल कारोबार बढिरहेको अवस्थामा विदेशी कार्डलाई स्थानीय क्यूआर नेटवर्कसँग जोड्ने यो पहलले पर्यटन व्यवसायमा नगदरहित कारोबारको सम्भावना थप बलियो बनाउने देखिएको छ।