काठमाडौँ– नेपाली काँग्रेसका महामन्त्री गगनकुमार थापाले रिगलको आममाफीले कानुनको अपव्याख्या र दुरुपयोग भएको बताएका छन। आज (बिहिार) प्रतिनिधि सभा बैठकमा बोल्दै उनले सरकारले हालै योगराज ढकाल ‘रिगल’लाई दिएको आममाफीका विषयमा आपत्ति प्रकट गर्दै पवित्र दिनलाई राज्यले अपवित्र बनाएको बताएका छन्।
यस्तै उनले कानुनको अपव्याख्या र दुरुपयोग भएकाले सदनमा ल्याएर त्यसलाई सच्याउन पहल गर्न पनि सभामुख देवराज घिमिरेसँग माग समेत गरेका छन्।
उनलाई सरकारसँग यसलाई सामान्य विषय सोचेर पन्छाउने काम नगर्न पनि चेतावनी दिएका छन्।
उनले संसदमा बिहीबार भने,‘६७० मध्ये कति संविधानसम्मत, कानुनसम्मत पनि छ होला। तर फेरि एक पटक संविधानको मर्म विपरीत र कानुनको छिद्रबाट बदनियतका साथ छिरेर गम्भीर अपराधको दोषी ठहर गरिएकालाई कैद माफी मिनाहा गरिएको छ। बदनियताका साथ भएको निर्णय गलत छ। यसको विरोध स्वाभाविक छ। वाञ्छनीय छ। यसको विरोध हुन्छ। हामी विरोध गर्दछौँ।’
सरकारले हत्यापछि जन्मकैद सजाय पाएका तरुण दलका नेता योगराज ढकाललाई आममाफी दिएपछि यसको राष्ट्रिय स्तरमा विरोध भइरहेको छ। तरुण दलका नेता रिगलले नेपालगञ्जमा चेतन मानन्धरलाई दिउँसै लखेटीलखेटी खुँडा हानेर मारेका थिए।