सरकारका कामलाई नकारात्मक दृष्टिले मात्रै हेर्नहुँदैन : गृहमन्त्री श्रेष्ठ - Chaitanya News
  • 2026-11-16
  • 13:36:23
  • सोमबार,मंसिर ०१, २०८३
  • सरकारका कामलाई नकारात्मक दृष्टिले मात्रै हेर्नहुँदैन : गृहमन्त्री श्रेष्ठ

    सरकारका कामलाई नकारात्मक दृष्टिले मात्रै हेर्नहुँदैन : गृहमन्त्री श्रेष्ठ

    काठमाडौं– गृहमन्त्री नारायणकाजी श्रेष्ठले सरकारका कामलाई नकारात्मक दृष्टिले मात्रै हेर्न नहुने बताएका छन। उनले आज पत्रकारसँग कुराकानी गर्दै सरकारले गरेका कामलाई सकारात्मकरूपमा लिनुपर्ने बताए।

    सरकारले जति काम गरेको छ त्यसलाई सकारात्मकरूपमा लिनुको सट्टा जति गरे पनि नकारात्मक हेर्ने दृष्टिकोणबाहेक केही पनि होइन श्रेष्ठले भने।’ भुटानी शरणार्थी र ललिता निवास जग्गा लगायतका भ्रष्टाचारका प्रकरणमा प्रहरीले स्वच्छ र स्वतन्त्र अनुसन्धान गर्ने उनले बताए।

    उनले भने, ‘स्वच्छ, स्वतन्त्र अनुसन्धानको आधारमा तथ्य र प्रमाणले जे देखाउँछ, त्यो विन्दुसम्म सरकार पुग्छ।’ यस विषयमा अरु ढङ्गले सोच्नुपर्ने आवश्यकता नरहेको उनको भनाइ थियो।

    बर्सात सुरु हुने समयमा विपद्को तयारी के छ भन्ने प्रश्नमा उनले विपद्को जोखिम न्यूनीकरण र व्यवस्थापनअन्तर्गत तयारीको कामलाई व्यवस्थित र प्रभावकारी बनाइएको बताए। ‘हामीलाई सामान, स्रोत, प्रविधिको अझै पनि केही अपर्याप्तता रहेको छ। तैपनि हामीले विपद् जोखिम न्यूनीकरण र व्यवस्थापनका सन्दर्भमा यसलाई व्यवस्थित र प्रभावकारी बनाउन सरकार लागेको छ उनले भने,।’

    फरक प्रसङ्गमा उपप्रधानमन्त्री श्रेष्ठले प्रधानमन्त्रीले सरकार बनाउन भारतले सहयोग गरेको भन्ने कुरा सत्य नरहेको बताए। बाहिर आएका समाचार हेर्दा पनि प्रधानमन्त्री बन्न भारत जानुपर्छ भन्ने नदेखिएको उल्लेख गर्दै उनले नेपालको प्रधानमन्त्री नेपालको संसद्ले निर्वाचित गर्ने बताए।

    जननिर्वाचित सरकार र जनताको शासन प्रणालीका निम्ति सबैभन्दा बढी सङ्घर्ष गर्ने नेताले यहाँको सरकार बनाउनका निमित्त विदेशको मुख ताक्ने वा विदेशतर्फ धाउने कुरा हुन नसक्ने उनले बताए। उनले भने, ‘यस विषयमा प्रधानमन्त्रीज्यूले आफ्नो धारणा सार्वजनिक गर्नुहुन्छ।