मन्त्रिपरिषदमा सशस्त्रका ४ जना डीआईजीको म्याद थप्ने प्रस्ताव - Chaitanya News
  • 2026-11-20
  • 02:09:49
  • बिहिबार,मंसिर ०४, २०८३
  • मन्त्रिपरिषदमा सशस्त्रका ४ जना डीआईजीको म्याद थप्ने प्रस्ताव

    मन्त्रिपरिषदमा सशस्त्रका ४ जना डीआईजीको म्याद थप्ने प्रस्ताव

    काठमाडौँ– सशस्त्रका चार जना डीआईजीलाई थमौती गर्न प्रस्ताव गरिएको छ । डीआईजीहरु कमल गिरी, गणेश ठाडामगर, कुलबहादुर नेम्बाङ र शम्भु सुवेदीको म्याद थप्न प्रस्ताव गरिएको गृह मन्त्रालयका एक जना उच्च अधिकृतले बताए ।

    सशस्त्र प्रहरी नियमावली–२०७२ अनुसार डीआईजीको पदावधि चार वर्षको हुन्छ। सरकारले चाहँदा १ वर्ष थप्न सकिने व्यवस्था छ। मन्त्रिपरिषद्बाट म्याद थप्ने निर्णय नभए उनीहरू पुस २३ मा अवकाशमा जान्छन्।

    म्याद थपको प्रस्ताव भएका कमल गिरी सशस्त्र प्रहरी बल प्रशिक्षण प्रतिष्ठानको कार्यकारी निर्देशक हुन्। गणेश ठाडामगर नम्बर–३ बाहिनी बागमती प्रदेशको प्रमुख, नेम्बाङ नम्बर–४ बाहिनी गण्डकी प्रदेशको प्रमुख र सुवेदी नम्बर–१ बाहिनी कोशी प्रदेशको प्रमुखको रूपमा कार्यरत छन्।

    उनीहरू कार्यक्षेत्र छाडेर राजनीतिक लबिङ र बिचौलियामार्फत म्याद थप गराउने चलखेलमा लागेको भन्दै सशस्त्र भित्रका उच्च अधिकृतहरू असन्तुष्ट छन्। नयाँ विधेयक संसदमा तत्काल दर्ता भएमा आईजीपी र एआईजी हुने अभिलाषाले उनीहरूले ‘अस्वस्थ चलखेल’ गरेको आरोप छ।

    सशस्त्र प्रहरी नियमावली–२०७२ अनुसार डीआईजीको चारवर्ष अवधि पुरा गरेर अवकाशमा हुन लागेमा ‘सरकारले आवश्यक ठाने १ वर्ष पदावधि थप गर्न सक्नेछ’ भन्ने प्रावधान छ। त्यही व्यवस्थालाई टेकेर भावी नेतृत्व नै हत्याउने गरी उनीहरू दौडमा निस्किएका हुन्।