आचार्यको पार्थिव शरीरमा राष्ट्रिय झण्डा ओढाएर प्रधानमन्त्रीले गरे सम्मान प्रकट - Chaitanya News
  • 2026-11-20
  • 00:10:06
  • बिहिबार,मंसिर ०४, २०८३
  • आचार्यको पार्थिव शरीरमा राष्ट्रिय झण्डा ओढाएर प्रधानमन्त्रीले गरे सम्मान प्रकट

    आचार्यको पार्थिव शरीरमा राष्ट्रिय झण्डा ओढाएर प्रधानमन्त्रीले गरे सम्मान प्रकट

    काठमाडौँ– भजन शिरोमणि, वरिष्ठ गायक तथा संगीतकार भक्तराज आचार्यको पार्थिव शरीरमा प्रधानमन्त्री पुष्पकमल दाहाल ‘प्रचण्ड’ ले राष्ट्रिय झण्डा ओढाएर सम्मान प्रकट गरेका छन्। आचार्यको पार्थिव शरीरलाई आज (मंगलबार) सङ्गीत तथा नाट्य प्रज्ञा प्रतिष्ठानको परिसरमा अन्तिम श्रद्धाञ्जलीका लागि राखिएको छ। अन्तिम श्रद्धाञ्जली गीतसङ्गीत क्षेत्रका हस्ती, कलाकर्मी लगायतको उपस्थिति रहेको छ।

    आचार्यको सोमबार अपराह्न ललितपुरको मेडिसिटी अस्पतालमा ८२ वर्षको उमेरमा निधन भएको हो। आचार्य विगत लामो समयदेखि बिमारी रहेका थिए। आचार्यले झन्डै ४०० गीतमा स्वर तथा सङ्गीत दिएका छन्। स्वरसम्राट नारायण गोपालका समकालीन गायक उनी १९९९ सालमा धनकुटामा जन्मिएका हुन्। नेपाली सुगम सङ्गीतमा उनको विशिष्ट स्थान छ।

    मुटु जलिरहेछ, जति चोट दिन्छौ, जहाँ छन् बुद्धका आँखा, हजार सपनाहरूको, माया मेरी साँझ बिहान, हजार आँखा हेर्ने लगायत गीत उनका गीत लोकप्रिय छन्। अन्तिम श्रद्धाञ्जलीपछि उनको पार्थिव शरीरलाई आजै पशुपति आर्यघाटमा अन्त्येष्टि गरिनेछ। आचार्य गायक सत्यराज र स्वरूपराज आचार्यका पिता हुन्।