सुरुङभित्र फसेका कामदार भिडियोमा देखिए, खाना पठाइयो - Chaitanya News
  • 2026-11-21
  • 22:13:48
  • शनिबार,मंसिर ०६, २०८३
  • सुरुङभित्र फसेका कामदार भिडियोमा देखिए, खाना पठाइयो

    सुरुङभित्र फसेका कामदार भिडियोमा देखिए, खाना पठाइयो

    उ

    काठमाडौं । भारतको उत्तराखण्डमा नौ दिनदेखि एउटा सुरुङमा फसेका ४१ कामदार पहिलोपटक भिडियोमा देखिएका छन् । सुरुङमा ‘ड्रिल’ गरिएको नयाँ पाइपबाट एन्डोस्कोपिक क्यामेरा प्रयोग गरेर सोमबार उक्त भिडियो खिचिएको हो ।

    ती कामदार सुरुङभित्र फसेयता उद्धारकर्ताले पाइपबाटै पहिलोपटक तातो ताजा खाना पठाएका छन् । उनीहरूले यसअघि साँघुरो पाइपबाट पठाइएको खाजा खाइरहेका थिए ।

    उत्तरकाशी जिल्लामा निर्माणाधीन सुरुङमार्गमा नोभेम्बर १२ मा पहिरो खसेपछि उनीहरू त्यहाँ अड्किएका हुन् । सोमबार साँझ उद्धारकर्ता सुरुङभित्र ६ इन्च खुकुलो पाइप धकेल्न सफल भएका थिए ।

    अब सुरुङभित्र कामदारलाई अक्सिजन, खाना, औषधि, मोबाइल फोन र चार्जरलगायत सामग्री पठाउन सजिलो हुने बताइएको छ ।

    मंगलबार उद्धारकार्य दशौँ दिनमा पुगेको छ । उद्धारकर्ताले ९०० मिलिमिटरको पाइप छिर्न सक्ने चौडाइ बनाएर उनीहरूलाई बाहिर निकाल्ने प्रयास गरिरहेका छन् ।

    अतिरिक्त उद्धारमार्गका रूपमा थप दुई सुरुङ खन्ने प्रयास पनि भइरहेको बताइएको छ ।