गेटास्थित मेडिकल विश्वविद्यालयमा १५१ चिकित्सक तथा स्वास्थ्यकर्मी छनोट - Chaitanya News
  • 2026-11-21
  • 13:48:34
  • शनिबार,मंसिर ०६, २०८३
  • गेटास्थित मेडिकल विश्वविद्यालयमा १५१ चिकित्सक तथा स्वास्थ्यकर्मी छनोट

    गेटास्थित मेडिकल विश्वविद्यालयमा १५१ चिकित्सक तथा स्वास्थ्यकर्मी छनोट

    धनगढीः कैलालीको गेटास्थित शहीद दशरथचन्द स्वास्थ्य विज्ञान विश्वविद्यालयले करार सेवामा नियुक्तिका लागि १३ वटा पदमा १५१ जना चिकित्सक तथा स्वास्थ्यकर्मी छनोट गरेको छ।

    विश्वविद्यालयले गत भदौ २६ गते करार सेवामा चिकित्सक तथा स्वास्थ्यकर्मी छनोटसम्बन्धी सूचना प्रकाशित गर्दै खुला प्रतिस्पर्धामार्फत पदपूर्ति प्रक्रिया अघि बढाएको थियो। छनोट समितिको सिफारिस तथा योग्यताक्रमका आधारमा सफल उम्मेदवारको नतिजा सार्वजनिक गरिएको हो।

    छनोट भएकामध्ये सबैभन्दा धेरै ९० जना स्टाफ नर्स रहेका छन्। यस्तै, १० जना फर्मेसी सहायक, १० जना प्रयोगशाला प्राविधिक, १० जना नर्सिङ अधिकृत र ६ जना रेडियोग्राफर छनोट भएका छन्।

    यसैगरी, चार जना डेन्टल सर्जन, तीन जना प्रयोगशाला प्रविधिज्ञ, दुई जना फिजियोथेरापी सहायक, दुई जना फिजियोथेरापी अधिकृत र दुई जना फर्मेसी अधिकृत छनोट भएका छन्।

    त्यस्तै, एक जना बायोमेडिकल इन्जिनियर र एक जना मेडिकल अधिकृत पनि छनोट भएका छन्।

    विश्वविद्यालयले सफल उम्मेदवारलाई आगामी मंसिर ११ गतेभित्र केन्द्रीय प्रशासन कार्यालयमा सम्पर्क गरी नियुक्तिपत्र बुझ्न सूचित गरेको छ।