काठमाडौं । नेपालमा झोलुङ्गे पूलको संख्या १० हजार नाघेको छ । तीनै तहका सरकारको संयुक्त पहलमा नेपालमा झोलुङ्गे पूलको संख्या १० हजार नाघेको हो । १० हजार नाघेको अवसर पारेर वाग्मती प्रदेश सरकारले सिन्धुलीको हरिहरपुरको हाकपारास्थित ‘मरिन खोला झोलुङ्गे पूल’को उद्घाटन विशेष कार्यक्रमका साथ सम्पन्न गरेको छ ।
नेपालमा झोलुङ्गे पूलको निर्माण अघिल्लो आर्थिक वर्षमा सबैभन्दा बढी भएका छन् । देशभरि कूल ७३० वटा पूल निर्माणको लक्ष्य राखिएकोमा अघिल्लो वर्ष ७४४ वटा निर्माण सम्पन्न भएको थियो ।
झोलुङ्गे पूलबाट कूल जनसंख्याको करिब दुई तिहाई आम नेपालीले सुरक्षित खोला, नदी तर्ने साधनको रुपमा उपभोग गरेका छन् । यसले जोखिमपूर्ण अवस्थामा रहेका तुइन यात्रा क्रमशः विस्थापित गर्दै लगेको छ । एक आंकडाअनुसार दैनिक १० लाख मानिस पूलमा आवतजावत गर्ने गरेका छन् ।
विद्यालय, स्वास्थ्य केन्द्र, सरकारी वा प्रशासनिक सेवा, बजार, व्यापार व्यवसायका लागि आवतजावतमा सहजता थपिएको छ । वाग्मती प्रदेश भौतिक पूर्वाधार विकास मन्त्रालयका सचिव अमृत श्रेष्ठका अनुसार झोलुङ्गे पूलको निर्माण अहिले देशैभरि द्रूत गतिमा भइरहेका छन् ।