काठमाडौँ– फागुन २१ मा हुने प्रतिनिधिसभा सदस्य निर्वाचनलाई केन्द्रमा राख्दै नेकपा एमालेले संगठनभित्रको शक्ति, भूगोल र रणनीतिक सन्तुलन देखिने गरी उम्मेदवार छनोटलाई तीव्र बनाएको छ। अध्यक्षदेखि महासचिव र सचिव तहसम्मका शीर्ष नेताहरू प्रत्यक्ष चुनावी मैदानमा उत्रने तयारीमा देखिएका छन्, जसले यस निर्वाचनलाई एमालेका लागि ‘नेतृत्व परीक्षण’ को रूपमा पनि व्याख्या गर्न थालिएको छ।

पुस १३ गते सचिवालय बैठकले मातहतका कमिटीलाई उम्मेदवार सिफारिस गर्न दिएको निर्देशनपछि क्षेत्रीय कमिटीहरू सक्रिय भएका छन्। सिफारिसको यो प्रक्रियाले पार्टीभित्र आगामी नेतृत्व र प्रभाव क्षेत्रको स्पष्ट संकेत दिन थालेको छ। पुस २४ गतेभित्र सबै नाम केन्द्रमा पुग्ने कार्यतालिका छ।

ओलीदेखि पोखरेलसम्मः गृह क्षेत्रकै भरोसामा
एमाले अध्यक्ष केपी शर्मा ओली झापा–५ बाट उम्मेदवार सिफारिस भएका छन् । झापा एमालेको परम्परागत बलियो आधार मानिन्छ, जहाँ ओलीलाई सर्वसम्मत सिफारिस गर्नु पार्टीले ‘सुरक्षित किल्ला’ जोगाउने रणनीति अपनाएको संकेत हो।

त्यसैगरी महासचिव शंकर पोखरेल दाङ–२ बाट एकल रूपमा सिफारिस भएका छन्। आफ्नो गृह क्षेत्रबाटै चुनाव लड्ने तयारीले पार्टीभित्र संगठनात्मक पकड बलियो भएको सन्देश दिन खोजिएको देखिन्छ।

उपाध्यक्षहरूको भूगोल: प्रभाव र प्रतिस्पर्धा:
उपाध्यक्ष विष्णु पौडेल रुपन्देही–२ बाट फेरि मैदानमा उत्रने तयारीमा छन् । २०६४ सालदेखि निरन्तर जित्दै आएका पौडेललाई एमालेले पुनः ‘जित्ने अनुहार’ का रूपमा अघि सारेको छ ।

यस्तै गोकर्ण विष्ट गुल्मी–२ बाट सिफारिस हुँदा सोही जिल्लाको अर्को क्षेत्र गुल्मी–१ बाट प्रदीप ज्ञवाली अघि सारिएका छन्। यसले गुल्मीमा एमालेले दुई प्रभावशाली अनुहारमार्फत बलियो सन्देश दिन खोजेको देखिन्छ। लमजुङमा भने प्रतिस्पर्धा चर्को देखिएको छ। उपाध्यक्ष पृथ्वीसुब्बा गुरुङसहित ६ जनाको नाम सिफारिस हुँदा पार्टीभित्र आन्तरिक छनोट कति चुनौतीपूर्ण छ भन्ने स्पष्ट हुन्छ।

उदाउँदा र स्थापित नेताको मिश्रण:
ताप्लेजुङबाट उपमहासचिव योगेश भट्टराईसहित पाँच जनाको नाम सिफारिस हुनु एमालेले स्थापित र उदाउँदा नेताबीच सन्तुलन खोजिरहेको संकेत हो। यस्तै धनुषाबाट रघुवीर महासेठ र कैलालीबाट लेखराज भट्ट उम्मेदवारीको तयारीमा छन्। सचिव तहका नेताहरू पनि आ–आफ्नो प्रभाव क्षेत्रबाट चुनावी तयारीमा छन्—महेश बस्नेत (भक्तपुर), राजन भट्टराई (काठमाडौँ–४) , खगराज अधिकारी (कास्की) लगायतका नामहरूले एमालेले केन्द्रदेखि जिल्लासम्म नेतृत्वलाई प्रत्यक्ष परीक्षणमा उतार्न खोजेको देखिन्छ।

समानुपातिक र प्रत्यक्षको सन्देश:
रामबहादुर थापा ‘बादल’, गुरु बराल र पद्मा अर्याल समानुपातिक सूचीमा परिसकेका छन्। यसले पार्टीले केही नेताहरूलाई संगठन र नीति निर्माणमा केन्द्रित राख्ने र केहीलाई प्रत्यक्ष जनमत परीक्षणमा उतार्ने रणनीति अपनाएको बुझिन्छ।

एमालेको यो उम्मेदवार छनोट प्रक्रिया केवल चुनावी तयारी मात्र होइन, पार्टीभित्रको शक्ति सन्तुलन, भूगोलगत प्रभाव र आगामी नेतृत्वको संकेतसमेत हो। फागुन २१ को चुनाव एमालेका लागि सिट संख्या मात्र होइन, शीर्ष नेताहरूको राजनीतिक वजन नाप्ने महत्वपूर्ण कसी बन्ने देखिन्छ।