- 2026-10-26
- 17:32:11
- सोमबार,कार्तिक १०, २०८३
काठमाडौँः साविक विजेता लुम्बिनी लायन्स र उपविजेता सुदूरपश्चिम रोयल्सबीचको प्रतिस्पर्धासँगै नेपाल प्रिमियर लिग (एनपीएल) को तेस्रो संस्करण आजदेखि सुरु हुँदैछ।
कीर्तिपुरस्थित त्रिभुवन विश्वविद्यालयको क्रिकेट मैदानमा अपराह्न साढे ४ बजे हुने उद्घाटन खेलमा गत संस्करणका फाइनलिस्ट टोली आमनेसामने हुँदैछन्।
लुम्बिनी र सुदूरपश्चिमबीच यसअघि भएका दुई संस्करणका तीन खेलमध्ये सुदूरपश्चिमले दुई खेल जितेको छ। तर, सबैभन्दा महत्त्वपूर्ण मानिएको दोस्रो संस्करणको फाइनलमा भने लुम्बिनीले बाजी मारेको थियो।
पहिलो संस्करणमा सुदूरपश्चिमले लुम्बिनीलाई ४५ रनले पराजित गरेको थियो। सैफ जैबको ९० रनको मद्दतमा सुदूरपश्चिमले २० ओभरमा चार विकेट गुमाएर १८७ रन बनाएको थियो। जवाफमा लुम्बिनीले नौ विकेट गुमाएर १४२ रन मात्रै बनाउन सकेको थियो।
दोस्रो संस्करणको लिग चरणमा पनि सुदूरपश्चिमले लुम्बिनीलाई सात विकेटले हराएको थियो। तर, फाइनलमा भने नतिजा उल्टियो। उपाधिका लागि भएको भिडन्तमा सुदूरपश्चिम १९.१ ओभरमा ८५ रनमै समेटिएको थियो। लुम्बिनीले ८६ रनको लक्ष्य नौ ओभरमै चार विकेट गुमाएर पूरा गर्दै ६ विकेटको जितसहित पहिलोपटक एनपीएलको उपाधि जितेको थियो।
तेस्रो संस्करणको उद्घाटन खेलमा दुवै टोली जितसहित प्रतियोगिताको सुरुआत गर्ने लक्ष्यमा हुनेछन्। रोहितकुमार पौडेलको कप्तानीमा रहेको लुम्बिनी उपाधि रक्षा अभियानलाई जितबाटै अघि बढाउन चाहन्छ। यता, दीपेन्द्रसिंह ऐरीको नेतृत्वमा रहेको सुदूरपश्चिम अघिल्लो संस्करणको फाइनलमा भोगेको हारको बदला लिने लक्ष्यमा हुनेछ।
दुई संस्करणमा भएका तीन भेटमा सुदूरपश्चिमले दुई खेल जिते पनि उपाधि भिडन्तमा लुम्बिनी विजयी भएको थियो। त्यसैले यसपटकको उद्घाटन खेल दुवै टोलीका लागि नयाँ सिजनको सुरुआतसँगै पुरानो प्रतिस्पर्धालाई निरन्तरता दिने अवसरसमेत बनेको छ।
Copyright © Aishworya Prakashan Pvt. Ltd. All Rights Reserved. Design & Developed by 
