- 2026-09-04
- 08:57:29
- शुक्रबार,भाद्र १९, २०८३
काठमाडौँ– भगवान् श्रीकृष्णको जन्मोत्सवका रूपमा मनाइने ‘श्रीकृष्ण जन्माष्टमी’ पर्व आज देशभर विभिन्न धार्मिक कार्यक्रम गरी मनाइँदै छ। कृष्णमन्दिरहरूमा बिहानैदेखि भक्तजनको चहलपहल बढेको छ भने पूजा–आराधना, भजन–कीर्तन, प्रवचन तथा व्रत बस्ने क्रम जारी छ।
भाद्रकृष्ण अष्टमीको मध्यरातमा भगवान् श्रीकृष्णको जन्म भएको धार्मिक विश्वासअनुसार वैदिक सनातन धर्मावलम्बीले आजको दिनलाई विशेष पर्वका रूपमा मनाउने गर्छन्। जन्माष्टमीको रातलाई ‘मोहरात्रि’ समेत भन्ने गरिन्छ।
पर्वका अवसरमा महिला तथा पुरुष भक्तजनले व्रत बसेर भगवान् श्रीकृष्णको पूजा–आराधना गर्ने र रातभर जाग्राम बस्ने परम्परा छ। देशभरका कृष्णमन्दिरमा विशेष पूजा, भजन–कीर्तन र धार्मिक प्रवचन आयोजना भइरहेका छन्।
ललितपुरको पाटन मङ्गलबजारस्थित प्रसिद्ध कृष्णमन्दिरमा जन्माष्टमीका अवसरमा विशेष मेला लागेको छ। यस्तै काठमाडौँको कागेश्वरी मनोहरा नगरपालिकास्थित नवतनधामलगायत देशभरका कृष्णमन्दिरमा भक्तजनको उल्लेख्य उपस्थिति रहेको छ।
धार्मिक सङ्घसंस्थाले श्रीकृष्णको झाँकीसहित शोभायात्रा तथा रथयात्रासमेत आयोजना गर्ने तयारी गरेका छन्। पर्वका कारण प्रमुख कृष्णमन्दिर तथा धार्मिक स्थलहरूमा भक्तजनको आवागमन बढेको छ।
धार्मिक मान्यताअनुसार भगवान् विष्णुको आठौँ अवतारका रूपमा श्रीकृष्णले अन्याय, अत्याचार र अधर्मविरुद्ध सत्य तथा सत्कर्मको पक्षमा उभिन मानव समुदायलाई प्रेरणा दिएका थिए। कुरुक्षेत्रको युद्धमा अर्जुनलाई श्रीकृष्णले दिएको उपदेशलाई ‘श्रीमद्भागवतगीता’का रूपमा मानिन्छ, जसले कर्म र कर्तव्यको महत्त्वलाई विशेष जोड दिएको छ।
जन्माष्टमी पर्वकै अवसरमा नेपाल सरकारले आज देशभर सार्वजनिक बिदा दिएको छ।
Copyright © Aishworya Prakashan Pvt. Ltd. All Rights Reserved. Design & Developed by 
